اردو ورلڈ کینیڈا ( ویب نیوز )پاکستان سپر لیگ (پی ایس ایل) سیزن 11 کے لیے کراچی کنگز نے اسکواڈ میں اہم تبدیلی کرتے ہوئے جنوبی افریقا کے بلے باز ریزا ہینڈرکس کو شامل کر لیا ہے۔
فرنچائز کی جانب سے جاری اعلامیے کے مطابق ریزا ہینڈرکس کو ویسٹ انڈیز کے کھلاڑی جانسن چارلس کے متبادل کے طور پر ٹیم میں شامل کیا گیا ہے۔ جانسن چارلس ذاتی وجوہات کی بنا پر ایونٹ سے دستبردار ہو گئے تھے۔کراچی کنگز کی انتظامیہ نے جانسن چارلس کے فیصلے کا احترام کرتے ہوئے ان کے لیے نیک خواہشات کا اظہار کیا اور امید ظاہر کی کہ وہ مستقبل میں دوبارہ لیگ کا حصہ بنیں گے۔
دوسری جانب ریزا ہینڈرکس کی شمولیت کو ٹیم کے لیے مثبت پیش رفت قرار دیا جا رہا ہے۔ وہ بین الاقوامی کرکٹ میں اپنی جارحانہ بیٹنگ اور مستقل مزاجی کے باعث پہچانے جاتے ہیں، اور ان کی موجودگی کراچی کنگز کی بیٹنگ لائن کو مزید مضبوط بنا سکتی ہے۔واضح رہے کہ پی ایس ایل 11 کا آغاز 26 مارچ سے ہوگا اور فائنل 3 مئی کو کھیلا جائے گا۔ کراچی کنگز اپنی مہم کا آغاز 27 مارچ کو کرے گی، جہاں اس کا پہلا مقابلہ کوئٹہ گلیڈی ایٹرز کے خلاف لاہور میں ہوگا۔شائقین کرکٹ اس سیزن میں ایک بار پھر سنسنی خیز مقابلوں کے منتظر ہیں، جبکہ ٹیموں نے اپنی تیاریاں مکمل کر لی ہیں۔
