اردو ورلڈ کینیڈا ( ویب نیوز)پاکستان تحریک انصاف کی سینئر قیادت نے فیصلہ کیا ہے کہ وہ صوبائی اسمبلیوں سے استعفے نہیں دینگے بلکہ اسمبلیاں تحلیل کریںگے
پی ٹی آئی کے چیئرمین اور سابق وزیراعظم عمران خان کی زیر صدارت پارٹی کا اجلاس ہوا جس میں پنجاب، سندھ اور کے پی کی سینئر قیادت نے شرکت کی جس میں جاری سیاسی صورتحال اور اسمبلیوں کی تحلیل پر تبادلہ خیال کیا گیا۔
اس موقع پر پی ٹی آئی رہنمائوں اسد عمر، شاہ محمود قریشی، فواد چوہدری، وزیراعلیٰ خیبرپختونخوا محمود خان، شفقت محمود، تیمور جھگڑا، علی امین گنڈا پور، علی ظفر ایڈووکیٹ، بابر اعوان، جمشید چیمہ، اعجاز چوہدری، فردوس شمیم نقوی، عثمان بزدار موجود تھے۔ میٹنگ میں اجلاس میں سپیکر پنجاب اسمبلی سبطین خان، ڈاکٹر یاسمین راشد، عاطف خان، عمر ایوب، سینئر صوبائی وزیر میاں اسلم اقبال، محمود الرشید
، سیکرٹری اطلاعات فرخ حبیب، قاسم سوری نے شرکت کی۔
اجلاس کے بعد فواد چوہدری کا کہنا تھا کہ پی ٹی آئی تین دن میں اسمبلیاں تحلیل کرنے کی تاریخ کا اعلان کرے گی۔
اس سے قبل پی ٹی آئی کے سینئر رہنما اور سابق وفاقی وزیر فواد چوہدری نے کہا تھا کہ صوبائی اسمبلیوں کی تحلیل کے حوالے سے حتمی تاریخ تین دن میں دی جائے گی۔
صوبائی اسمبلیوں کی تحلیل کے معاملے پر میڈیا سے گفتگو کرتے ہوئے فواد چوہدری کا کہنا تھا کہ اس معاملے پر پی ٹی آئی قیادت کا اجلاس ہوا، جس میں صوبائی اسمبلیاں تحلیل کرنے کا فیصلہ کیا گیا۔ انہوں نے کہا کہ جمعہ کے اجلاس کے بعد پنجاب اور کے پی کی اسمبلیاں تحلیل کر دی جائیں گی۔
