اردوورلڈ کینیڈا( ویب نیوز)وزیراعلیٰ مریم نواز نے کہا ہے کہ پنجاب حکومت کرپشن کی لعنت کو ہمیشہ کے لیے ختم کرنے کے لیے پرعزم ہے۔
انسداد بدعنوانی کے دن کے موقع پر اپنے پیغام میں وزیراعلیٰ پنجاب مریم نواز نے کہا کہ کرپشن نہ صرف اخلاقی گراوٹ بلکہ ملکی ترقی کی قاتل ہے۔ کرپشن نہ صرف قومی وسائل کو نقصان پہنچاتی ہے بلکہ عوام کے اعتماد کو بھی متزلزل کرتی ہے۔
انہوں نے کہا کہ پہلے دن سے بدعنوانی کے خاتمے کے لیے زیرو ٹالرنس کی پالیسی اپنائی گئی ہے۔ ہر قسم کی کرپشن کے خلاف سخت اقدامات کیے جا رہے ہیں۔ کرپشن کسی بھی سطح پر برداشت نہیں کی جائے گی۔
مریم نواز نے کہا کہ گورننس سسٹم میں شفافیت اور احتساب کو یقینی بنانے کے لیے کے پی آئیز متعارف کرائے گئے ہیں۔ کے پی آئی سسٹم نے سرکاری افسران کو زیادہ موثر اور متحرک بنایا ہے جس سے عوامی خدمات میں بہتری آئی ہے۔
وزیراعلیٰ پنجاب نے مزید کہا کہ ہمارا مقصد کرپشن سے پاک، ترقی یافتہ اور خوشحال پاکستان ہے۔ معاشرے کو کرپشن کی لعنت سے پاک کرنے کے لیے ہر فرد کو اپنا کردار ادا کرنا چاہیے۔ شفافیت، دیانتداری اور میرٹ کو فروغ دینا اجتماعی ذمہ داری ہے۔
