اردوورلڈکینیڈا ( ویب نیوز )پنجاب حکومت نے سول اور فوجی تنصیبات میں حالیہ ہنگاموں اور توڑ پھوڑ کی تحقیقات کے لیے جے آئی ٹی بنانے کا فیصلہ کیا ہے۔
نگر ان وزیراعلیٰ محسن نقوی کی زیر صدارت پنجاب سیف سٹیز اتھارٹی کے ہیڈ آفس میں امن و امان کی صورتحال پر اجلاس ہوا، جس میں جناح ہاؤس میں چوری اور آتشزدگی کی تحقیقات کے لیے جے آئی ٹی بنانے کا فیصلہ کیا گیا جے آئی ٹی تحقیقات کر کے حکومت کو ایک جامع رپورٹ پیش کرے گی۔
ہنگامہ آرائی کیس، تحریک انصاف کے 102 ملزمان کو 14 روزہ جوڈیشل ریمانڈ پر جیل بھیجنے کا حکم
اجلاس میں تمام شرپسندوں کو کیفر کردار تک پہنچانے کے لیے کارروائیاں تیز کرنے کا بھی حکم دیا گیا۔
محسن نقوی نے کہا کہ جرائم کی تمام جگہوں پر جیو فینسنگ کی جائے گی، شرپسندوں کے خلاف تمام مقدمات انسداد دہشت گردی کی عدالت میں چلیں گے، کسی مجرم کو بخشا نہیں جائے گا اور کسی بے گناہ کو نہیں پکڑا جائے گا، شواہد اور ثبوت کے ساتھ ہر شرپسند کو انصاف کے کٹہرے میں لایا جائے گا۔
محسن نقوی نے کہا کہ فوجی اور سویلین املاک پر حملہ کرنے والے عناصر کو کڑی سزا سے نہیں بخشا جائے گا، شرپسندوں کے خلاف زیرو ٹالرنس کی پالیسی اپنائی گئی ہے، حالات بہتر ہو رہے ہیں، عوام کے جان و مال کے تحفظ کو یقینی بنائیں گے۔ شرپسندوں کے مذموم عزائم کو ناکام بنانے کے لیے پوری فورس چوکس ہے۔
