اردوورلڈ کینیڈا ( ویب نیوز)قائد اعظم محمد علی جناح کے یوم پیدائش کے موقع پر چیئرمین جوائنٹ چیفس آف اسٹاف کمیٹی، سروس چیفس اور پاکستان کی مسلح افواج نے بابائے قوم کو بھرپور خراج عقیدت پیش کیا ہے۔
پاک فوج کی انٹر سروسز پبلک ریلیشنز (آئی ایس پی آر) کی طرف سے جاری کردہ ایک پیغام میں کہا گیا ہے کہ مسلح افواج قائداعظم کے پائیدار وژن اور بے مثال قیادت کو خراج تحسین پیش کرتی ہیں، جن کی انتھک کوششوں نے قوم کو متحد کیا اور اس کی بنیاد رکھی اور ایک خودمختار اور آزاد پاکستان دیا
اعلامیہ میں کہا گیا ہے کہ اس قومی دن پر ہم ان کے اتحاد، ایمان اور تنظیم کے رہنما اصولوں کے لیے اپنی غیر متزلزل وابستگی کی تجدید کرتے ہیں جو آج بھی قوم کے لیے روشنی کی کرن بنے ہوئے ہیں۔
اس کے علاوہ، مسلح افواج نے کرسمس کے موقع پر مسیحی برادری کو دلی مبارکباد دی اور کہا کہ ہم اپنے مسیحی بھائیوں اور بہنوں کے ساتھ محبت، ہمدردی اور امن کی عالمی اقدار کا جشن مناتے ہیں جو اس موقع کی روح ہیں۔
بیان میں کہا گیا ہے کہ پاکستان کی مسلح افواج قومی سلامتی، انصاف اور ہم آہنگی کے اصولوں پر عمل کرتے ہوئے اپنے عوام اور وطن کی خدمت کے لیے پرعزم ہیں۔
