ترجمان پی ڈی ایم اے کے مطابق 28 مئی سے یکم جون تک پنجاب کے مختلف اضلاع میں موسلادھار بارش کا امکان ہے، صوبے کے بیشتر اضلاع میں گرد آلود ہوائیں چلنے اور گرج چمک کے ساتھ بارش ہوسکتی ہے۔
پی ڈی ایم اے کے ترجمان نے راولپنڈی، مری، گلیات، اٹک، چکوال، جہلم اور منڈی بہاؤالدین، گجرات، گوجرانوالہ، حافظ آباد، سیالکوٹ، نارووال، خوشاب، سرگودھا اور میانوالی میں گرج چمک کے ساتھ بارش کی پیش گوئی کی ہے۔
اسی طرح لاہور، قصور، اوکاڑہ، فیصل آباد، ٹوبہ ٹیک سنگھ اور جھنگ میں بھی بارش اور طوفان کی پیشگوئی کی گئی ہے۔
پراونشل ڈیزاسٹر مینجمنٹ اتھارٹی (PDMA) نے پنجاب بھر کی ضلعی انتظامیہ کو موسم کی صورتحال سے آگاہ کرتے ہوئے الرٹ رہنے کی ہدایت کی ہے۔
دوسری جانب ملک کے بالائی علاقوں میں محکمہ موسمیات نے یکم جولائی تک بارشوں کا امکان ظاہر کیا ہے۔
محکمہ موسمیات کے مطابق ملک کے بالائی علاقوں میں چند مقامات پر بادل برسیں گے، مغربی ہوائیں 28 مئی کو ملک کے بالائی علاقوں کو متاثر کریں گی۔
موسم کا حال بتانے والوں کا کہنا ہے کہ 28 سے 29 مئی کے درمیان بلوچستان میں چند مقامات پر گرج چمک کے ساتھ بارش کا امکان ہے جب کہ اسلام آباد اور مری سمیت پنجاب کے بیشتر مقامات پر تیز ہواؤں کے ساتھ بارش کا امکان ہے۔ .
محکمہ موسمیات کے مطابق آج سے یکم جون کے درمیان خیبرپختونخوا کے بعض مقامات پر گرج چمک کے ساتھ بارش کا امکان ہے جب کہ گلگت بلتستان میں بھی آندھی، ژالہ باری اور بارش کا امکان ہے۔ جبکہ جنوبی علاقوں میں گرمی کی لہر جاری رہے گی۔