اردوورلڈ کینیڈا ( ویب نیوز ) ملک کے مختلف علاقوں میں بارشیں ہورہی ہیں جس کے باعث سیلاب کا خطر ہ ہے
شمال مشرقی اور جنوبی بلوچستان میں ہلکی اور تیز بارش کا سلسلہ جاری ہے۔پی ڈی ایم اے کے مطابق بعض مقامات پر موسلادھار بارش کی وجہ سے بارشی ندی نالوں میں طغیانی کا خطرہ ہے۔
ترجمان این ایچ اے کا کہنا ہے کہ این 50 دھنسر تا ژوب ڈی آئی خان شاہراہ کو ٹریفک کے لیے بحال کردیا گیا ہے، اس کے علاوہ پنجرہ پل پر سیلاب کے باعث ٹریفک معطل ہے، بوٹا قلعہ سیف اللہ سیکشن این 70 پر ٹریفک بحال کردی گئی ہے۔
بلوچستان میں موسلادھار بارش سے ندی نالوں میں طغیانی اور نشیبی علاقے زیر آب آگئے۔
ترجمان کا کہنا ہے کہ لینڈ سلائیڈنگ کے باعث ٹریفک معطل ہے جب کہ بحالی کا کام جاری ہے۔
پنجاب میں بھی بارش
دوسری جانب راولپنڈی اور چونیاں سمیت پنجاب کے مختلف شہروں میں تیز اور ہلکی بارش کا سلسلہ جاری ہے۔
پنجاب کے دریاؤں میں پانی کا بہاؤ مسلسل بڑھ رہا ہے، ننکانہ، ٹوبہ ٹیک سنگھ، اوکاڑہ اور شیخوپورہ کی انتظامیہ کو بھی الرٹ جاری کر دیا گیا ہے۔
اس کے علاوہ لاہور، ساہیوال، قصور، اوکاڑہ، پاکپتن، وہاڑی، بہاولنگر، سرگودھا، ڈی جی خان، بہاولپور، بھکر، لیہ، مظفر گڑھ، راجن پور اور رحیم یار خان میں سیلاب کا خطرہ ہے۔
