اردو ورلڈ کینیڈا ( ویب نیوز )افریقی ملک گیمبیا میں پارلیمانی انکوائری کمیٹی نے کھانسی کے شربت سے 69 بچوں کی موت کے معاملے میں ایک بھارتی دوا ساز کمپنی کے خلاف مقدمہ چلانے کی سفارش کی ہے۔
غیر ملکی خبر رساں ادارے کے مطابق گیمبیا میں بھارتی شربت سے 69 بچے ہلاک ہوگئے تھے
ایک پارلیمانی کمیٹی نے دہلی کی دوا ساز کمپنی میڈن فارماسیوٹیکلز کے خلاف ملاوٹ شدہ ادویات فروخت کرنے پر قانونی کارروائی کا مطالبہ کیا ہے۔
کئی ہفتوں کی تحقیقات کے بعد کمیٹی نے رپورٹ میں بھارتی کمپنی کی تمام ادویات پر پابندی اور اس کے خلاف سخت کارروائی کا حکم دیا۔
ورلڈ ہیلتھ آرگنائزیشن نے اس شربت سمیت بھارت میں تیار ہونے والی چار ادویات کے حوالے سے الرٹ جاری کرتے ہوئے ان پر پابندی لگانے کا حکم دیا ہے۔
ایجنسی کا کہنا تھا کہ ان ادویات میں ایسے کیمیکل موجود ہیں جو انسانی زندگی کے لیے زہریلے ہیں۔
گیمبیا میں ہندوستانی دوا پینے سے 69 بچے گردے کو شدید نقصان پہنچنے سے ہلاک ہوگئے۔
دوسری جانب میڈن فارما نے ان الزامات کی تردید کی ہے۔ جبکہ بھارت میں اس کمپنی کی ادویات کے ٹیسٹ سرکاری لیبارٹریز سے کیے گئے ہیں جن میں ان دوائیوں کے ٹھیک ہونے کی رپورٹس سامنے آئی ہیں۔ بھارتی حکام نے بھی عالمی ادارہ صحت کے الزامات کو بے بنیاد قرار دیا ہے۔
