یہ اپیل اُس وقت سامنے آئی جب حال ہی میں دو اسرائیلی قیدیوں کی نئی ویڈیوز منظرِ عام پر آئیں، جن میں انہیں شدید غذائی قلت اور خراب صحت کا شکار دکھایا گیا ہے۔ان ویڈیوز کے منظر عام پر آنے کے بعد ریڈ کراس نے بھی اسرائیلی یرغمالیوں تک رسائی کا مطالبہ کیا ہے تاکہ ان کی بنیادی انسانی ضروریات پوری کی جا سکیں۔ نیتن یاہو نے زور دیا ہے کہ انسانی بنیادوں پر یرغمالیوں کو فوری امداد دی جائے اور ریڈ کراس اپنا کردار ادا کرے۔

دوسری جانب حماس کے عسکری ونگ القسام بریگیڈز کے ترجمان ابو عبیدہ نے اس معاملے پر ردعمل دیتے ہوئے کہا ہے کہ وہ ریڈ کراس کے ساتھ تعاون کے لیے تیار ہیں، تاہم اس کے لیے چند شرائط رکھی گئی ہیں۔ ان کے مطابق، غزہ میں انسانی امداد کی روانی کو یقینی بنانا ہوگا اور ہر علاقے میں شہریوں تک خوراک اور ادویات کی فراہمی مستقل بنیادوں پر جاری رکھنی ہوگی۔

ابو عبیدہ نے مزید کہا کہ اگر اسرائیل غزہ پر فضائی کارروائیاں مکمل طور پر بند کر دیتا ہے، تو اس کے بعد یرغمالیوں کو خوراک اور طبی امداد کی فراہمی ممکن بنائی جا سکتی ہے۔ انہوں نے اس تاثر کی بھی نفی کی کہ حماس جان بوجھ کر یرغمالیوں کو بھوکا رکھتی ہے، اور واضح کیا کہ القسام بریگیڈ انسانی حقوق کے دائرے میں رہ کر کام کرتی ہے۔

واضح رہے کہ غزہ میں جاری اسرائیلی بمباری اور محاصرے کے باعث انسانی بحران شدت اختیار کر چکا ہے، اور فلسطینی عوام کے ساتھ ساتھ اسرائیلی یرغمالی بھی غذائی قلت اور طبی سہولیات کے فقدان کا سامنا کر رہے ہیں۔ اس صورتِ حال میں بین الاقوامی اداروں کے کردار پر بھی سوالات اٹھ رہے ہیں، اور انسانی حقوق کی تنظیمیں فریقین سے تحمل اور انسانی بنیادوں پر اقدامات کا مطالبہ کر رہی ہیں۔