اردو ورلڈ کینیڈا ( ویب نیوز ) نومنتخب امریکی صدر ڈونلڈ ٹرمپ کی حمایت حاصل کرنے والے ریپبلکن رہنما مائیک جانسن امریکی ایوان نمائندگان کے دوبارہ اسپیکر منتخب ہوگئے۔
غیر ملکی میڈیا رپورٹس کے مطابق نئی کانگریس کے پہلے روز جمعہ کو ریپبلکن رہنما مائیک جانسن ووٹنگ کے پہلے مرحلے میں انتہائی کم فرق سے ایوان نمائندگان کے اسپیکر منتخب ہوگئے۔مائیک جانسن کو 218 ووٹ ملے جب کہ ڈیموکریٹ حکیم جیفریز کو 215 ووٹ ملے۔رپورٹ کے مطابق ابتدائی طور پر تین ریپبلکن ارکان رالف نارمن (جنوبی کیرولائنا) کیتھ سیلف (ٹیکساس) اور تھامس میسی (کینٹکی) نے جانسن کے خلاف ووٹ دیا۔ تاہم، نارمن اور سیلف نے حیران کن طور پر جانسن کے ساتھ ایک مختصر ملاقات کے بعد اپنا ووٹ تبدیل کیا۔
دوسری جانب تمام ڈیموکریٹک ارکان نے اقلیتی رہنما حکیم جیفریز کے حق میں ووٹ دیا۔اطلاعات کے مطابق ریپبلکنز نے اب باضابطہ طور پر ایوان نمائندگان اور سینیٹ دونوں کا کنٹرول حاصل کر لیا ہے اور ارکان نے حلف بھی اٹھا لیا ہے۔ نومنتخب صدر ڈونلڈ ٹرمپ کی انتخابی کامیابی کی تصدیق کے لیے کانگریس پیر کو دوبارہ اجلاس کرے گی۔ریپبلکنز کو ایوان میں اپنی کم اکثریت کی وجہ سے قانون سازی کے لیے سخت چیلنجز کا سامنا کرنا پڑ سکتا ہے۔ پارٹی کے اندر کوئی اختلاف رائے ووٹ کو پٹڑی سے اتار سکتا ہے، جبکہ سینیٹ میں زیادہ تر قانون سازی کے لیے ڈیموکریٹس کی حمایت کی ضرورت ہوگی۔
