اردوورلڈ کینیڈا( ویب نیوز)لاہور ہائیکورٹ نے وزیر اعظم شہباز شریف کے خلاف توہین عدالت کی درخواست قابل سماعت ہونے سے متعلق وفاقی حکومت سے جواب طلب کر لیا۔
لاہور ہائیکورٹ میں وزیراعظم شہباز شریف کی جانب سے ججز کے بارے میں نامناسب الفاظ کہنے پر توہین عدالت کی درخواست کی سماعت ہوئی۔ جسٹس محمد وحید خان نے اشبا کامران کی درخواست پر سماعت کی۔
وزیراعظم کے پرنسپل سیکرٹری کی جانب سے درخواست میں فیڈریشن کو فریق بنایا گیا ہے۔
سماعت کے دوران جسٹس وحید خان نے ایڈیشنل اٹارنی جنرل سے کہا کہ بتائیں یہ درخواست قابل سماعت ہے یا نہیں۔ جس پر ایڈیشنل اٹارنی جنرل نے کہا کہ گزشتہ روز سپریم کورٹ نے بھی یہی سوال اٹھایا تھا۔
وفاقی حکومت کے وکیل نے کہا کہ اٹارنی جنرل نے سپریم کورٹ پر واضح کیا ہے کہ وزیراعظم نے موجودہ ججز کے بارے میں یہ نہیں کہا۔
عدالت نے استفسار کیا کہ کیا آپ کے پاس تحریری حکم ہے؟ جس پر وفاقی حکومت کے وکیل نے کہا کہ سپریم کورٹ سے تاحال تحریری حکم نامہ موصول نہیں ہوا۔
بعد ازاں عدالت نے وزیراعظم کے خلاف توہین عدالت کی درخواست قابل سماعت ہونے سے متعلق وفاقی حکومت سے جواب طلب کرلیا۔
