اردو ورلڈ کینیڈا ( ویب نیوز ) امیر ممالک غریب ملکوں کو شیطانی ہتھکنڈوں سے تنگ کر رہے ہیں , اقوام متحدہ کے سیکریٹری جنرل انتونیو گوتریس کی غریب ممالک پر ڈالے جانے والے دباؤ کی شدید مذمت ۔

امیر ممالک ترقی پذیر اور غریب ممالک پر شرح سود بڑھانے کے لیے دباؤ ڈال رہے ہیں۔ اس کا یہ عمل قابل مذمت ہے۔ ان خیالات کا اظہار ۔انتونیو گوٹیرس نے ہفتے کے روز قطر میں اقوام متحدہ کے زیر اہتمام کم ترقی یافتہ ممالک کے سربراہی اجلاس سے خطاب کرتے ہوئے  کیا ۔

اقوام متحدہ کے سیکرٹری جنرل نے کہا کہ غریب ممالک غربت کے بدترین دور سے گزر رہے ہیں، اس کے باوجود امیر ممالک کے رویے درست نہیں ہو رہے۔ ایسا لگتا ہے کہ امیر ممالک نے عالمی مالیاتی نظام کو صرف اپنے فائدے کے لیے بنایا ہے۔

انہوں نے اس بات پر زور دیا کہ امیر ممالک کو چاہیے کہ وہ دوسرے ممالک کی مدد کے لیے سالانہ 500 ارب ڈالر فراہم کریں تاکہ وہ مشکلات سے نکل سکیں اور ان کا تعلیم، صحت اور معاشی نظام بہتر ہو سکے۔

واضح رہے کہ 46 ایل ڈی سیز کا سربراہی اجلاس عام طور پر ہر 10 سال بعد ہوتا ہے لیکن 2021 کے بعد سے یہ سربراہی اجلاس کورونا وائرس کی وجہ سے دو بار ملتوی ہو چکا ہے۔

دو غریب ترین ممالک، افغانستان اور میانمار نے قطر کے دارالحکومت دوحہ میں ہونے والے اجلاس میں شرکت نہیں کی کیونکہ ان کی حکومتوں کو اقوام متحدہ کے ارکان تسلیم نہیں کرتے ۔