اردو ورلڈ کینیڈا ( ویب نیوز ) سعودی حکومت نے مختلف بیماریوں میں مبتلا مسافروں کے لیے نئی سفری پابندیاں عائد کر دیں ۔
نئی پابندیوں کے مطابق گردن توڑکے بخار سمیت دیگر ویکسین لازمی قرار دی گئی ہیں۔سعودی سول ایوی ایشن اتھارٹی (SCAA) نے دنیا بھر کی تمام ایئرلائنز کو مطلع کیا ہے اور دنیا کے کسی بھی حصے سے سعودی عرب آنے والے مسافروں کے لیے ہدایت پر عمل درآمد کرنے کی ہدایات جاری کی ہیں۔سعودی سول ایوی ایشن کے مطابق صحت سے متعلق نئی ہدایات پر سختی سے عمل درآمد ضروری ہے۔ ویکسینیشن کے نئے رہنما خطوط سعودی وزارت صحت کی ویب سائٹ پر دستیاب ہیں۔ تمام ایئر لائنز سعودی عرب آنے والے اپنے مسافروں کو گردن توڑ بخار اور دیگر بیماریوں سے بچاؤ کے ٹیکے ضرور لگوائیں۔
مسافروں کے پاس آمد سے کم از کم 10 دن پہلے جاری کیا گیا ویکسینیشن سرٹیفکیٹ ہونا چاہیے، اور پولی سیکرائیڈ قسم کے لیے ویکسینیشن سرٹیفکیٹ 3 سال اور کنجوگیٹڈ قسم کے لیے 5 سال سے زیادہ پرانا نہیں ہونا چاہیے۔ہدایت میں کہا گیا ہے کہ ایک سال اور اس سے کم عمر کے بچے اس ویکسین سے مستثنیٰ ہیں اور ایئر لائنز کو سفر کے دوران ضروری احتیاطی تدابیر اختیار کرنی چاہئیں۔ سعودی ایوی ایشن کے احکامات کی خلاف ورزی کرنے والی ایئر لائنز اور مسافروں کے خلاف قانونی کارروائی کی جائے گی۔
