اردو ورلڈ کینیڈ ا ( وی نیوز ) فلسطینی عوام کو زبردستی بے دخل کرنے کی کسی بھی کوشش کو واضح طور پر مسترد کرتے ہیں ، سعودی عرب کا غزہ میں فوری جنگ بندی کا مطالبہ۔
سعودی وزیر مملکت برائے خارجہ امور عادل الجبیر نے کہا کہ غزہ میں اسرائیل کے جرائم اور انسانی حقوق کی سنگین خلاف ورزیاں بین الاقوامی قوانین اور اقوام متحدہ کے چارٹر کی صریح خلاف ورزی ہیں۔ انہوں نے کہا کہ ہم سب کو فلسطینی عوام کے مصائب کے خاتمے کے لیے مل کر کام کرنا چاہیے۔عادل الجبیر نے فلسطینیوں کی جبری منتقلی کے خلاف سعودی عرب کے موقف کا اعادہ کیا اور غزہ میں جنگ بندی کا مطالبہ بھی کیا۔انہوں نے مزید کہا کہ سعودی عرب کسی بھی ایسی تجویز یا حل کو مسترد کرتا ہے جو فلسطینی عوام کے حق خود ارادیت اور آزادی کے جائز مطالبات کو پورا نہ کرے، جس میں 1967 کی سرحدوں پر مبنی ایک آزاد اور خودمختار فلسطینی ریاست کا قیام بھی شامل ہے۔واضح رہے کہ یہ بیان ایسے وقت میں سامنے آیا ہے جب امریکی میڈیا نے کل یہ دعویٰ کیا تھا کہ ٹرمپ انتظامیہ 10 لاکھ فلسطینیوں کو مستقل طور پر غزہ سے لیبیا منتقل کرنے کے منصوبے پر کام کر رہی ہے۔ایک سابق امریکی اہلکار کا کہنا ہے کہ امریکا نے لیبیا کی قیادت کے ساتھ اس منصوبے پر بھی بات چیت کی ہے۔
