اردو ورلڈ کینیڈا ( ویب نیوز )  سعودی عرب نے اتوار کے روز اعلان کیا کہ وہ اس سال اپنی پہلی خاتون خلاباز ریانہ برناوی کو سعودی پارٹنر علی القرنی کے ساتھ 10 روزہ مشن پر بین الاقوامی خلائی اسٹیشن پر بھیجے گا۔

رپورٹس کے مطابق دونوں خلاباز AX-2 خلائی مشن کے عملے میں شامل ہوں گے، جسے اس سال کے آخر میں فلوریڈا کے کینیڈی اسپیس سینٹر میں لانچ کیا جائے گا۔

عرب میڈیا کا کہنا ہے کہ اس مشن کا مقصد انسانی خلائی پرواز میں سعودی عرب کی صلاحیتوں کو بڑھانا، انسانیت کی خدمت کرنا اور خلائی صنعت کی جانب سے پیش کردہ امید افزا مواقع سے فائدہ اٹھانا ہے، اس کے ساتھ ساتھ صحت اور خلائی ٹیکنالوجی جیسے کئی پہلوؤں میں سائنسی تحقیق بھی شامل ہے۔

سعودی پریس ایجنسی کے مطابق، برناوی اور القرنی کے علاوہ، دو دیگر خلابازوں، مریم فردوس اور علی الغامدی کو بھی سعودی ہیومن اسپیس فلائٹ پروگرام کے تحت مستقبل کے خلائی مشنوں کے لیے تربیت دی جا رہی ہے۔