گزشتہ روز ہونے والی ٹیلیفونک گفتگو میں وزیراعظم شہباز شریف نے سعودی ولی عہد کو دورہ پاکستان کی دعوت بھی دی جس پر سعودی ولی عہد نے وزیراعظم شہباز شریف کا شکریہ ادا کیا۔پاکستان میں نئی حکومت آنے کے بعد محمد بن سلمان پاکستان کا دورہ کرنے والے پہلے غیر ملکی سربراہ ہوسکتے ہیں، وہ رمضان المبارک کے فوراً بعد پاکستان آسکتے ہیں۔اس فون کال کے فوری بعد وزیراعظم شہباز شریف نے ٹوئٹر پر پیغام بھیجا کہ ولی عہد کی جانب سے موصول ہونے والے پیغام پر بے حد مشکور ہوں۔
وزیراعظم نے سعودی ولی عہد کے لیے نیک تمناؤں کا اظہار بھی کیا۔شہباز شریف نے کہا کہ حکومت چین، امریکہ، خلیجی ممالک اور اہم یورپی اور مشرق بعید کے ممالک سے سفارتی ذرائع سے موصول ہونے والے مبارکباد اور حمایت کے پیغامات سے مطمئن ہے۔ ان ممالک نے حکومت کو یقین دلایا ہے کہ ملک میں پیدا ہونے والی پیچیدگیوں کو دور کیا جائے گا۔ نئی حکومت کو کامیاب بنانے کے لیے تعاون کیا جائے گا۔ذرائع کا کہنا ہے کہ گزشتہ دو سالوں کے دوران ملنے والے یہ اشارے بہت حوصلہ افزا ہیں کیونکہ پاکستان اہم ممالک کے دارالحکومتوں میں اپنا روایتی اثر و رسوخ کھو چکا ہے۔