اردو ورلڈ کینیڈا ( ویب نیوز ) مشرق وسطیٰ کی صورتحال پر سلامتی کونسل کے اجلاس میں چین، روس اور الجزائر نے حماس کے رہنما اسماعیل ہنیہ کے قتل کی مذمت کی۔ایران کی درخواست پر بلائے گئے سلامتی کونسل کے اجلاس میں مشرق وسطیٰ میں بڑھتی ہوئی کشیدگی کو روکنے کے لیے سفارتی کوششوں کو تیز کرنے پر زور دیا گیا۔اجلاس میں ایرانی سفیر نے کہا کہ تہران نے ہمیشہ تحمل کا مظاہرہ کیا ہے لیکن اسے جواب دینے کا حق حاصل ہے۔ایرانی سفیر نے اجلاس سے مطالبہ کیا کہ سلامتی کونسل اسرائیلی حملے کی مذمت کرے اور اسرائیل پر پابندیاں عائد کرے۔نائب اسرائیلی سفیر جوناتھن ملر نے ایرانی سفیر کے جواب میں کہا کہ سلامتی کونسل نے علاقائی دہشت گردی کی حمایت پر ایران پر پابندیاں عائد کر دی ہیں۔اسرائیلی سفیر نے کہا کہ اسرائیل اپنا دفاع کرے گا، نقصان پہنچانے والوں کو طاقت کے ساتھ جواب دے گا۔سلامتی کونسل کے اجلاس میں چین کے سفیر فو کانگ نے کہا کہ غزہ جنگ بندی کی ناکامی خطے میں کشیدگی کا باعث ہے۔برطانوی سفیر باربرا ووڈورڈ نے کہا کہ اسرائیل اور فلسطین کو امن کے لیے نئی کوششیں کرنی چاہئیں۔سلامتی کونسل کے اجلاس میں امریکی نائب سفیر رابرٹ ووڈ نے کہا کہ بااثر ممالک کو ایران پر کشیدگی کم کرنے کے لیے دباؤ ڈالنا چاہیے۔نائب جاپانی سفیر شینو مٹسوکو نے کہا کہ مشرق وسطیٰ جنگ کے دہانے پر پہنچ گیا ہے۔