اردوورلڈ کینیڈا( ویب نیوز)سیکورٹی فورسز نے مہمند میں ایف سی ہیڈ کوارٹر پر خارجی دہشت گردوں کے حملے کو ناکام بنا دیا۔
آئی ایس پی آر کے مطابق فتنہ الخوارج کے 4 دہشت گردوں نے 6 ستمبر کو مہمند میں ایف سی ہیڈ کوارٹر کو نشانہ بنانے کی کوشش کی، سیکیورٹی فورسز نے بروقت کارروائی کرتے ہوئے خارجی دہشت گردوں کا حملہ ناکام بنا دیا۔ سیکیورٹی فورسز کی کارروائی میں 4خوارجی خودکش حملہ آور مارے گئے۔
آئی ایس پی آر کے مطابق علاقے کو دہشت گردوں سے پاک کرنے کے لیے فورسز کا آپریشن جاری ہے۔ پاکستان کی سیکیورٹی فورسز ملک سے دہشت گردی کی لعنت کے خاتمے کے لیے چوکس اور پرعزم ہیں۔
دوسری جانب وفاقی وزیر داخلہ محسن نقوی نے مہمند میں ایف سی ہیڈ کوارٹر پر فتنہ الخوارج کے دہشت گردوں کے حملے کی کوشش ناکام بنانے پر سیکیورٹی فورسز کو خراج تحسین پیش کیا ہے۔ وزیر داخلہ نے کہا کہ سیکورٹی فورسز نے اندھیرے میں حملہ کرنے والے بزدل دشمن کے مذموم عزائم کو خاک میں ملا دیا۔