ishtiaq ahmed 
وزیراعظم شہباز شریف کی زیر صدارت حکمران اتحاد کے رہنماؤں کے اجلاس کی اندرونی کہانی سامنے آگئی۔
ذرائع کے مطابق اجلاس میں مسلم لیگ (ن) کے قائد اور سابق وزیراعظم نواز شریف نے اتحادی جماعتوں کو ہدایت کی کہ آئندہ 48 گھنٹوں میں پی ٹی آئی کے خلاف ریفرنس سپریم کورٹ بھجوایا جائے۔
ذرائع کا کہنا ہے کہ نواز شریف نے ہدایت کی ہے کہ سپریم کورٹ سے درخواست کی جائے کہ اس ریفرنس کی سماعت فل کورٹ کرے
نواز شریف نے کہا کہ ملک دشمن عناصر کے ایجنڈے پر عدم استحکام پیدا کرنے والوں سے کوئی رعایت نہیں برتی جائے گی، سی پیک اور کشمیر ڈیل کے رول بیک میں عمران خان بھی براہ راست ملوث ہیں۔
اس موقع پر قومی وطن پارٹی کے سربراہ آفتاب شیرپاؤ نے کہا کہ مخلوط حکومت کو اب کارکردگی دکھانا ہوگی، حکومت کو ہر صورت مہنگائی پر قابو پانا ہے۔
اجلاس میں فیصلہ کیا گیا کہ اتحادی جماعتیں ملک بھر میں تحریک انصاف کے خلاف جلسے کریں گی
جے یو آئی پشاور میں جلسہ کرے گی، پختونخوا میپ اور بی این پی مینگل کوئٹہ میں، مسلم لیگ ن لاہور، راولپنڈی اور اسلام آباد میں جلسے کرے گی۔
