اردو ورلڈ کینیڈا ( ویب نیوز ) میٹا صارفین 2016 سے اینڈرائیڈ میسجنگ ایپ میسنجر کو بطور ایس ایم ایس ایپ استعمال کر رہے ہیں تاہم اب یہ فیچر اگلے ماہ سے مرحلہ وار ختم کیا جا رہا ہے۔

عالمی میڈیا رپورٹس کے مطابق ایس ایم ایس یا ایم ایم ایس میسجز کے لیے میسنجر استعمال کرنے والے صارفین کو میٹا کی جانب سے شائع ہونے والے ایک آرٹیکل کے ذریعے اس تبدیلی سے آگاہ کیا گیا، جس کے بعد صارفین گوگل یا سام سنگ۔ میسجنگ ایپ کو استعمال کرنے پر مجبور کیا جائے گا۔

آرٹیکل میں کہا گیا ہے کہ 28 ستمبر 2023 کو میسنجر ایپ اپ ڈیٹ کے بعد صارفین میسج بھیجنے اور وصول کرنے کے لیے میسنجر کا استعمال نہیں کر سکیں گے۔اعلان کے مطابق میٹا صارفین کے فون کی ڈیفالٹ میسجنگ ایپ پر پیغامات بھیجے گا۔ صارفین اپنے فون کی سیٹنگز میں جا کر آسانی سے میسنجر ایپ کا آپشن تبدیل کر سکتے ہیں۔واضح رہے کہ فیس بک میسنجر نے سب سے پہلے ایس ایم ایس کا فیچر 2012 میں متعارف کرایا تھا لیکن اسے 2013 میں معطل کر دیا گیا تھا تاہم اسے 2016 میں پرپل اور بلیو تھیمز کا استعمال کرتے ہوئے بحال کر دیا گیا تھا۔