نگراں وفاقی وزیر آئی پی سی فواد حسن فواد نے تصدیق کی ہے کہ محسن نقوی کو پاکستان کرکٹ بورڈ کے بی او جی میں پیٹرن نمائندہ نامزد کیا گیا ہے جس کا نوٹیفکیشن بھی جاری کر دیا گیا ہے۔ انہوں نے کہا کہ ذکاء اشرف کی جگہ محسن نقوی کو بی او جی میں نامزد کیا گیا ہے، وزیراعظم نے ذکاء اشرف کا استعفیٰ بھی منظور کر لیا ہے، جس کے بعد الیکشن کمشنر شاہ خاور کو پی سی بی آئین کے تحت قائم مقام چیئرمین پی سی مقرر کیا گیا ہے۔ فواد حسن فواد کا کہنا تھا کہ ان کی شاہ خاور سے ملاقات ہوئی جس میں انہیں کہا گیا کہ پاکستان کرکٹ بورڈ کا بی او جی جلد مکمل کر کے انتخابی عمل مکمل کیا جائے۔واضح رہے کہ پی سی بی کے آئین کے آرٹیکل 7 کی شق 2 کے مطابق چیئرمین کا عہدہ خالی ہوتے ہی تمام اختیارات چیف الیکشن کمشنر کو منتقل ہو جاتے ہیں اور آئینی طور پر وہ پی سی بی کے انتخاب کا عمل مکمل کرنے کے پابند ہوں گے۔ چار ہفتوں کے اندر بورڈ انتخاب کے بعد منتخب چیئرمین ایک ہفتے میں اپنے عہدے کا چارج سنبھال سکتا ہے۔
موجودہ صورتحال میں محسن نقوی کے چیئرمین پی سی بی بننے کی راہ ہموار ہوگئی ہے کیونکہ محسن نقوی پی سی بی الیکشن کی تاریخ تک نگران وزیراعلیٰ پنجاب کی ذمہ داریوں سے سبکدوش ہو جائیں گے اور فروری کے عام انتخابات تک چارج سنبھال لیں گے۔