9
اردوورلڈکینیڈا(ویب نیوز)وزیراعظم شہباز شریف اور سعودی عرب کے ولی عہد محمد بن سلمان کے درمیان ٹیلیفونک رابطہ ہوا، جس میں عالمی و علاقائی امن و استحکام کے لیے جاری کوششوں پر تفصیلی بات چیت ہوئی۔ اس موقع پر وزیراعظم نے سعودی عرب کے ساتھ ہر مشکل وقت میں مکمل یکجہتی کا اظہار کیا۔
سعودی میڈیا کے مطابق دونوں رہنماؤں نے خطے کی سلامتی کو لاحق خطرات پر تشویش کا اظہار کیا اور باہمی تعاون کی ضرورت پر زور دیا۔ وزیراعظم نے کہا کہ پاکستان جاری بحران کے خاتمے کے لیے بامقصد مذاکرات کی میزبانی کرنے کے لیے تیار ہے اور اس میں پاکستان کے لیے فخر ہے۔
شہباز شریف نے مزید کہا کہ خطے اور دنیا میں امن و استحکام کے لیے مذاکرات ضروری ہیں اور پاکستان مشرق وسطیٰ میں جاری تنازعات کے حل کے لیے مذاکرات کی سہولت فراہم کرنے کو خوش آمدید کہتا ہے، بشرطیکہ امریکا اور ایران اس پر رضامند ہوں۔
وزیراعظم نے واضح کیا کہ پاکستان نتیجہ خیز مذاکرات کے انعقاد کے لیے ہر ممکن تعاون کرے گا اور اس خدمت کو اعزاز کے طور پر سمجھتا ہے۔
