اردوورلڈ کینیڈا ( ویب نیوز )وزیر اعظم شہباز شریف نے سندھ میں سیلاب متاثرین کی امداد کے لیے 25 ارب روپے کی منظوری دے دی۔
ذرائع کے مطابق یہ رقم سندھ میں سیلاب متاثرین کی مدد پر خرچ کی جائے گی، وزیراعظم نے جمعے کو پیپلزپارٹی کے وفد سے ملاقات میں فنڈز کی فراہمی کی یقین دہانی کرائی تھی۔
واضح رہے کہ چیئرمین پیپلز پارٹی بلاول بھٹو زرداری نے گزشتہ دنوں سوات میں جلسے سے خطاب کرتے ہوئے وزیراعظم پر بجٹ میں وعدے پورے نہ کرنے کا الزام عائد کرتے ہوئے خبردار کیا تھا کہ پیسے نہ ملے تو پیپلز پارٹی بجٹ منظور ی میں ساتھ نہیں دے گی۔
پیپلز پارٹی کا بجٹ پراختلاف،شہباز شریف آج اہم اجلاس میں اتحادیوں کو منائیں گے
اپنے خطاب کے دوران انہوں نے وزیراعظم اور ان کی معاشی ٹیم پر دوہرے معیار کا الزام بھی لگایا اور کہا کہ وزیراعظم شہباز شریف نے کہا بجٹ میں کچھ اور آیا کچھ۔ ان لوگوں کا حساب ضرور لیں جو وعدے پورے کرنے میں رکاوٹ ہیں۔
انہوں نے کہا کہ ہمیں وزیراعظم کی نیت پر شک نہیں، انہوں نے سیلاب کی تباہی خود دیکھی، سیلاب متاثرین سے کیے گئے وعدے پورے کریں، ہمیں عوام کی پرواہ ہے جب کہ دیگر جماعتوں کو مخصوص لوگوں کا خیال ہے۔
وزیر اعظم نے اس سلسلے میں اجلاس میں آج طلب کیا ہے ذرائع کے مطابق اجلاس میں چیئرمین پیپلز پارٹی اور وزیر خارجہ بلاول بھٹو زرداری اور دونوں جماعتوں کے وزراء اور مالیاتی امور سے متعلق ماہرین شرکت کریں گے جس میں بجٹ سے متعلق امور پر غور کیا جائے گا۔
