اردوورلڈ کینیڈا( ویب نیوز)وزیراعظم شہباز شریف نے کہا ہے کہ جابرانہ اقدامات سے کشمیریوں کی حق خود ارادیت کی خواہش کم نہیں ہو سکتی یوم سیاہ پر اپنے پیغام میں وزیراعظم شہباز شریف نے کہا کہ آج سے 77 سال قبل بھارت نے کشمیر پر قبضہ کیا تھا، بھارتی قابض افواج کشمیریوں پر ظلم کر رہی ہیں، گزشتہ 77 سالوں میں مقبوضہ کشمیر کے عوام کو بے شمار مشکلات کا سامنا ہے۔.
انہوں نے کہا کہ 5 اگست 2019 سے بھارت مقبوضہ کشمیر پر اپنی گرفت مضبوط کرنے کے لیے یکے بعد دیگرے اقدامات کر رہا ہے۔.
شہباز شریف نے کہا کہ ہندوستان کے مذموم ارادوں کا مقصد مقبوضہ کشمیر کی متنازعہ حیثیت کو نقصان پہنچانا اور کشمیری عوام کو ان کے مستقبل کا فیصلہ کرنے کے جمہوری حق سے محروم کرنا ہے۔
وزیراعظم نے مزید کہا کہ کشمیری عوام کی قربانیاں رائیگاں نہیں جائیں گی، پاکستان کشمیریوں کی مکمل حمایت جاری رکھے گا۔.