اردو ورلڈ کینیڈا ( ویب نیوز )وزیراعظم محمد شہباز شریف نے یونان کے قریب بحیرہ روم میں کشتی ڈوبنے کے واقعے کی تحقیقات کا حکم دیا ہے۔وزیراعظم نے انسانی سمگلنگ میں ملوث افراد کے خلاف کریک ڈاؤن کی ہدایت کی اور قانون نافذ کرنے والے اداروں کو ہدایت کی کہ وہ انسانی سمگلروں کی نشاندہی کریں جو لوگوں کو دھوکہ دے کر خطرناک اقدامات کرتے ہیں۔
انہوں نے انسانی سمگلنگ جیسے گھناؤنے جرائم میں ملوث ایجنٹوں کے خلاف فوری کریک ڈاؤن اور سخت سزا دینے کی بھی ہدایت کی ہے۔
وزیر اعظم کی ہدایت پر ایف آئی اے نے ڈی آئی جی عالم شنواری کو واقعے میں جاں بحق اور زخمی ہونے والوں کی معلومات اور سہولت کے لیے فوکل پرسن مقرر کیا ہے۔
آزاد جموں و کشمیر کے چیف سیکرٹری نے پاکستانی سفارتخانے اور یونانی حکام سے رابطہ کرکے جاں بحق اور زخمیوں کے بارے میں آگاہ کرنے کے لیے فوکل پرسن بھی مقرر کیا ہے۔
وزیراعظم محمد شہباز شریف نے بحیرہ روم میں کشتی الٹنے کے واقعے میں پاکستانیوں کے جاں بحق ہونے پر گہرے دکھ اور افسوس کا اظہار کیا ہے۔ انہوں نے کہا کہ مجھ سمیت پوری قوم کی ہمدردیاں جاں بحق ہونے والوں کے لواحقین کے ساتھ ہیں۔
وزیراعظم نے یونان میں پاکستانی سفارتخانے کو واقعے میں بازیاب ہونے والے 12 پاکستانیوں کی دیکھ بھال کی ہدایت کی ہے۔
واضح رہے کہ یونان کے قریب بحیرہ روم میں تارکین وطن کی کشتی ڈوبنے سے 79 افراد ہلاک ہو گئے تھے۔ جاں بحق ہونے والوں میں 27 پاکستانیوں کی شناخت ہو گئی ہے جبکہ 50 سے زائد لاپتہ ہیں۔
