اردو ورلڈ کینیڈا ( ویب نیوز )وزیر اعظم شہباز شریف نے پاکستان کے سیلاب زدہ عوام کی بروقت مدد کرنے پر ترک حکومت اور عوام کا شکریہ ادا کیا ہے جو دونوں ممالک کے درمیان برادرانہ تعلقات کا مظہر ہے۔
وہ جمعہ کو اسلام آباد میں وزیر داخلہ سلیمان سویلو اور وزیر ماحولیات مرات کورم کی قیادت میں ترکی کے وفد سے گفتگو کر رہے تھے۔
وزیر اعظم نے سیلاب سے ہونے والے انسانی اور مادی نقصانات پر ہمدردی اور تعزیت کا اظہار کرنے اور اس آب و ہوا سے پیدا ہونے والی آفت سے نمٹنے اور ہر ممکن تعاون فراہم کرنے کے لیے ترکی کے عزم کا اعادہ کرنے کے لیے صدر رجب طیب اردوان کا شکریہ ادا کیا۔
شہباز شریف نے وفد کو بتایا کہ سیلاب سے تین سو بچوں سمیت ہزار سے زائد افراد جاں بحق ہوئے، فصلیں اور مویشی بہہ گئے اور لاکھوں افراد بے گھر ہو گئے۔
ترکی کے وزیر داخلہ سلیمان سویلو نے ملک کے تمام حصوں میں تباہ کن سیلاب سے متاثر ہونے والے انفراسٹرکچر کی بحالی اور لوگوں کو بچانے اور ریلیف دینے کے لیے وزیر اعظم شہباز شریف اور ان کی حکومت کی بھرپور امدادی کوششوں کو سراہا۔
ترک وزیر نے اپنی حکومت اور عوام کی جانب سے حکومت پاکستان کی امداد اور بحالی کی کوششوں میں مالی تعاون کرنے کے پختہ عزم کا اظہار کیا۔
