اردو ورلڈ کینیڈا ( ویب نیوز )وزیراعظم شہباز شریف ایک بار پھر مسلم لیگ ن کے بلامقابلہ صدر جبکہ مریم نواز شریف بلامقابلہ نائب صدر منتخب ہو گئیں۔
احسن اقبال جنرل سیکرٹری، مریم اورنگزیب انفارمیشن سیکرٹری، اسحاق ڈار فنانس سیکرٹری، عطاء اللہ تارڑ ڈپٹی سیکرٹری مسلم لیگ ن، اسحاق ڈار صدر برائے اوورسیز اینڈ انٹرنیشنل افیئر منتخب ہو گئے۔
پاکستان مسلم لیگ (ن) کی مرکزی جنرل کونسل کا اجلاس وزیراعظم شہباز شریف کی زیر صدارت ہوا، اجلاس میں مسلم لیگ (ن) کی سینئر نائب صدر مریم نواز، حمزہ شہباز، احسن اقبال اور خواجہ آصف نے بھی شرکت کی۔
اجلاس میں صدر مسلم لیگ (ن) پنجاب رانا ثناء اللہ، صدر سندھ شاہ محمد شاہ، صدر خیبر پختونخوا امیر مقام کے علاوہ مسلم لیگ (ن) آزاد کشمیر شاہ غلام قادر نے بھی شرکت کی
اس موقع پر مریم اورنگزیب نے جنرل کونسل اجلاس میں قرارداد پیش کی، قرارداد میں نواز شریف پر مکمل اعتماد کا اظہار کیا گیا، قرارداد میں شہباز شریف کو خراج تحسین پیش کیا گیا، قرارداد میں مقبوضہ کشمیر کے شہداء کو خراج عقیدت پیش کیا گیا۔
قرارداد میں 9 مئی کے واقعات کی مذمت کی گئی، قرارداد میں شہدائے پاکستان کی قربانیوں کو سلام پیش کیا گیا۔ ۔
دریں اثناء میاں نواز شریف کے مسلم لیگ (ن) کے تاحیات قائد ہونے کی ایک بار پھر تصدیق ہوگئی، صوبائی صدور اور سیکرٹری جنرلز کا اعلان پارٹی صدر کریں گے۔
میاں محمد شہباز شریف کو جنرل کونسل نے پارٹی کے فیصلوں کا مینڈیٹ دیا تھا، پارٹی کے دیگر عہدیداروں کا فیصلہ صدر مسلم لیگ (ن) شہباز شریف کریں گے۔
پاکستان مسلم لیگ ن کی مرکزی جنرل کونسل کے اجلاس میں شاہد خاقان عباسی اور مفتاح اسماعیل نے شرکت نہیں کی، اجلاس میں شاہد خاقان عباسی کے لیے کسی عہدے کا اعلان نہیں کیا گیا۔
