اردوورلڈ کینیڈا( ویب نیوز)امریکی صدر ڈونلڈ ٹرمپ نے اسلامی ممالک کے سربراہان کے ساتھ اجلاس کے اختتام پر وزیراعظم شہباز شریف اور نائب وزیرِاعظم اسحاق ڈار سے ملاقات کی۔ اس موقع پر صدر ٹرمپ اور وزیراعظم نے گرمجوشی سے مصافحہ کیا اور خوشگوار ماحول میں غیر رسمی گفتگو بھی ہوئی۔

نیویارک میں اقوام متحدہ کی جنرل اسمبلی کے اجلاس کے دوران وزیراعظم شہباز شریف نے عرب اسلامی سربراہی اجلاس میں بھی شرکت کی، جہاں علاقائی اور بین الاقوامی امور پر تبادلہ خیال ہوا۔

دوسری جانب ترک صدر رجب طیب اردوان نے امریکی صدر اور مسلم ممالک کے رہنماؤں کی ملاقات کو نہایت مفید قرار دیا۔

اس سے قبل وزیراعظم شہباز شریف سے کویت کے ولی عہد نے ملاقات کی، جس میں مشرق وسطیٰ کی موجودہ صورتحال اور دیگر علاقائی و بین الاقوامی امور پر بات چیت کی گئی۔ ولی عہد نے فلسطینی عوام پر ہونے والے مظالم کو بے نقاب کرنے میں پاکستان کی سفارتی کوششوں کو سراہا اور دونوں رہنماؤں نے دوطرفہ اور کثیر جہتی فورمز پر قریبی تعاون جاری رکھنے کے عزم کا اعادہ کیا۔