اردو ورلڈ کینیڈا ( ویب نیوز ) پاکستان مسلم لیگ نواز کے رہنما شاہد خاقان عباسی نے ملک میں سیاسی انجینئرنگ میں مبینہ طور پر ملوث ہونے پر قومی احتساب بیورو کو ختم کرنے کے اپنے مطالبے کا اعادہ کیا۔
سابق وزیراعظم نے ان خیالات کا اظہار وفاقی دارالحکومت کی احتساب عدالت کے باہر ایل این جی کیس کی سماعت کے بعد میڈیا سے گفتگو میں کیا۔ انہوں نے کہا کہ "نام نہاد” احتساب کا مقصد صرف سیاستدانوں کو بدنام کرنا ہے۔ ملک کی سالمیت کے لیے نیب کو ختم کیا جائے
میں 70 بار عدالت میں پیش ہو چکا ہوں۔ اگر عدالت کو میرے خلاف کوئی ثبوت ملتا تو اسے زیادہ سے زیادہ تین سماعتوں میں کیس کا فیصلہ کرنا چاہیے تھا
نیب کے سابق چیئرمین ریٹائرڈ جسٹس جاوید اقبال کو "اپنا مجرم” قرار دیتے ہوئے مسلم لیگ ن کے رہنما نے کہا کہ جاوید اقبال کو ہمت کرنی چاہیے اور اپنی غلطیوں کا اعتراف کرنا چاہیے۔
جہاں تک کیس کا تعلق ہے، انہوں نے کہا کہ ایل این جی ٹرمینل معاہدے سے ملک کو بڑے پیمانے پر فائدہ ہوا۔ انہوں نے کہا کہ حکومت نے پاکستان کو ڈیفالٹ سے بچایا، معیشت کو مزید مضبوط بنانے کے لیے اقدامات کیے جا رہے ہیں۔
