اردوورلڈ کینیڈا ( ویب نیوز )عوامی مسلم لیگ کے سربراہ اور سابق وفاقی وزیر داخلہ شیخ رشید احمد نے کہا کہ 13 جماعتوں کا بھان متی خاندان جلد ایک دوسرے کا پوسٹ مارٹم کرنے والا ہے، ان کی ہانڈی چوک اور چوراہے پر پھٹنے والی ہے۔
سماجی رابطے کی ویب سائٹ ٹوئٹر پر اپنے پیغام میں شیخ رشید نے کہا کہ 20 سے الٹی گنتی شروع ہوگی اور 12 اگست تک نتائج سامنے آئیں گے
انہوں نے کہا کہ ہر کوئی اپنی تاریخ دے رہا ہے لیکن سپریم کورٹ بھی فیصلہ دے گی اور الیکشن ہو کر رہیں گے۔ الیکشن کمیشن الیکشن کی تیاریوں میں مصروف ہے۔
13 پارٹیوں کابھان متی کاکنبہ عنقریب ایک دوسرے کا پوسٹمارٹم کرنے والا ہے 13 پارٹیوں کی ہانڈی چوک اور چوراہے میں پھٹنے والی ہے 20 تاریخ سےالٹی گنتی شروع ہو جائے گی اور 12 اگست تک کٹی کٹا نکل آئے گا الیکشن 60 دنوں یا 90 دنوں میں ہوتے ہیں اس کا فیصلہ 10 اگست تک ہو جائے گا جو پنجاب…
— Sheikh Rashid Ahmed (@ShkhRasheed) July 12, 2023
سابق وفاقی وزیر کا کہنا تھا کہ جے آئی ٹی اور سپریم کورٹ نے نواز شریف کو اپنے دفاع کا پورا موقع دیا، 5 رکنی بینچ نے فیصلہ دیا، لیکن قطری خط 1122 کا کردار ادا نہ کر سکا اور تاحیات نااہل ہو گیا، نواز شریف بیمار ہونے کا بہانہ کر کے 50 روپے کے اسٹامپ پیپر پر لندن چلے گئے۔
عوامی مسلم لیگ کے سربراہ نے کہا کہ بھائی وزیر اعظم کے ہاتھ میں سفارتی پاسپورٹ ہے تو کس خوف سے انہیں پاکستان آنے سے روکا جا رہا ہے، نواز شریف کے آنے یا نہ آنے سے پاکستان کی سیاست میں کوئی فرق نہیں پڑے گا ۔
انہوں نے کہا کہ خود کو طرم خان سمجھنے والے انتظار کریں، ان کے چودہ طبقے جلد روشن ہوں گے، میرے بلاول کے ارمان آنسوؤں میں بہہ جائیں گے، شہباز شریف بھی نگران وزیراعظم کے اختیارات خود چلمن کے پیچھے استعمال کرنا چاہتے ہیں۔ ہاں، لیول پلیئنگ فیلڈ کو بھول جاؤ، یہ کہانی ختم ہو گئی، 24 کروڑ لوگوں کی امنگوں کو نظر انداز نہیں کیا جا سکتا۔
شیخ رشید کا مزید کہنا تھا کہ موجودہ حکومت مہمان اداکار ہے، اگست میں نگران حکومت کا انتظار ہے ۔
