اردوورلڈ کینیڈا ( ویب نیوز )وزیراعظم شہباز شریف کا کہنا ہے کہ ہم خطے میں کشیدگی نہیں چاہتے، ہم دنیا میں خوشحالی اور امن کا فروغ چاہتے ہیں۔
پاکستان اور سوئٹزرلینڈ کے درمیان قدرتی آفات سے نمٹنے کے لیے مفاہمت کی یادداشت پر دستخط کی تقریب سے خطاب کرتے ہوئے وزیراعظم شہباز شریف نے کہا کہ دوست ملک سوئٹزرلینڈ کے وزیر خارجہ کا خیر مقدم کرتے ہیں، سوئس وزیر خارجہ سے مفید اور تعمیری بات چیت ہوئی۔
وزیراعظم نے کہا کہ سوئس وزیر خارجہ سے مختلف شعبوں میں تعاون بڑھانے پر بات ہوئی، ماضی کی طرح وسائل ضائع نہیں ہونے دیں گے، جدید ٹیکنالوجی اور دیگر شعبوں میں تعاون بڑھائیں گے۔
وزیراعظم نے کہا کہ دونوں ممالک سیاحت کو فروغ دیں گے، پاکستان تعلیم، آئی ٹی اور خواتین کی تعلیم کے فروغ میں کردار ادا کرتا رہے گا۔
وزیر اعظم شہباز شریف نے سوئٹزرلینڈ کے وزیر خارجہ سمیت سوئس وفد سے بھی ملاقات کی جو پاکستان آئے اور ان کا استقبال کیا۔
پاکستان اور سوئٹزرلینڈ کے درمیان مفاہمت کی اس یادداشت پر دستخط وزیر اعظم شہباز شریف کے پاکستان میں ڈیزاسٹر مینجمنٹ کو بین الاقوامی معیار کے مطابق کرنے کے وژن کے تحت ایک اہم قدم ہے۔ مفاہمت کی یادداشت پر دستخط کے بعد پاکستان اور سوئٹزرلینڈ کے درمیان قدرتی آفات اور ان کے ممکنہ نقصانات کی پیش گوئی، فوری امدادی کارروائیوں اور بحالی کے اقدامات میں تعاون کو فروغ دیا جائے گا۔
