اردو ورلڈ کینیڈا ( ویب نیوز ) نائجیریا کی شمال مغربی ریاست کدونا میں نامعلوم مسلح ملزمان نے مسجد میں گھس کر نمازیوں پر فائرنگ کردی جس کے نتیجے میں 7 نمازی شہید اور متعدد زخمی ہوگئے۔

عالمی خبر رساں ادارے کے مطابق ریاست کدونا کے ایک دور افتادہ گاؤں کی مسجد میں اس وقت فائرنگ کی گئی جب نمازیوں کی بڑی تعداد نماز ادا کر رہی تھی۔ ملزمان نے پوری کارروائی اطمینان سے کی اور فرار ہو گئے۔

کدونا پولیس کے ترجمان منصور ہارونہ نے رائٹرز کو بتایا کہ حملہ آوروں کی تلاش جاری ہے، ابھی تک کسی شدت پسند گروپ نے حملے کی ذمہ داری قبول نہیں کی۔مسجد میں فائرنگ سے زخمی ہونے والے 10 سے زائد نمازیوں کو قریبی ہسپتال منتقل کر دیا گیا جہاں دو نمازیوں کی حالت تشویشناک ہونے کے باعث جاں بحق افراد کی تعداد میں اضافے کا خدشہ ہے۔گزشتہ 3 سالوں سے، مسلح گروہوں نے نائجیریا کے شمال مغرب میں امن و امان کو درہم برہم کر رکھا ہے۔

ہزاروں لوگوں کو اغوا کرکے تاوان دیا گیا اور درجنوں کو عدم ادائیگی پر قتل کیا گیا۔سڑک پر سفر کرنا محفوظ ہے اور نہ ہی بھتہ اور تاوان کی ادائیگی کے بغیر کھیتی باڑی کرنا آسان ہے۔ پولیس اور فوج ان علاقوں میں مکمل طور پر ناکام ہو چکی ہے۔ قانون نافذ کرنے والے ادارے حملے کی زد میں ہیں۔