اردو ورلڈ کینیڈا ( ویب نیوز ) او آئی سی نے جنوبی ایشیا میں سیکورٹی کی بگڑتی ہوئی صورتحال پر تشویش کا اظہار کیا ہے اور اقوام متحدہ کے چارٹر، بین الاقوامی قانون اور انڈس واٹر ٹریٹی سمیت معاہدوں کے تقدس کو برقرار رکھنے کی اہمیت پر زور دیا ہے۔
پاکستان کے ایک اعلیٰ سطحی پارلیمانی وفد نے اقوام متحدہ میں اسلامی تعاون تنظیم کے سفیروں کو پاک بھارت جنگ اور اس کے بعد جاری صورتحال سے آگاہ کیا ہے۔نیویارک میں اقوام متحدہ کے ہیڈ کوارٹر میں منعقدہ اجلاس میں او آئی سی کے مستقل نمائندوں سے خطاب کرتے ہوئے بلاول بھٹو نے بغیر کسی تحقیق یا ثبوت کے پہلگام واقعے کو پاکستان سے جوڑنے کی ہندوستان کی کوشش کو سختی سے مسترد کردیا۔بلاول بھٹو نے واضح کیا کہ یہ جلد بازی کا الزام بھارت کی طرف سے غیر قانونی فوجی کارروائیوں کو جواز فراہم کرنے کے لیے استعمال کیا گیا اور ان حملوں میں شہریوں اور شہری انفراسٹرکچر کو نشانہ بنایا گیا۔بلاول بھٹو زرداری نے سندھ آبی معاہدے کی یکطرفہ معطلی پر گہری تشویش کا اظہار کرتے ہوئے کہا کہ بھارت پاکستان کے خلاف پانی کو بطور ہتھیار استعمال کرنے کی کوشش کر رہا ہے۔. انہوں نے واضح طور پر کہا کہ اس رویے کو معمول بننے کی اجازت نہیں دی جا سکتی۔
سابق وزیر خارجہ نے تنازعات میں کمی، ثالثی اور جنگ بندی کی کوششوں پر او آئی سی کے رکن ممالک کا شکریہ ادا کیا۔. انہوں نے کہا کہ امن کا واحد راستہ بات چیت، مشغولیت اور سفارت کاری ہے۔پاکستان کی امن، تحمل اور سفارتی راستے پر چلنے کی پالیسی کا اعادہ کرتے ہوئے، بلاول بھٹو نے انڈس واٹر ٹریٹی کی بحالی، جنگ بندی کا مکمل احترام، اور ہندوستان کے ساتھ جامع مذاکرات دوبارہ شروع کرنے کا مطالبہ کیا۔بلاول بھٹو نے جموں و کشمیر کے عوام کی مسلسل حمایت پر او آئی سی کے رکن ممالک کا شکریہ ادا کیا۔. انہوں نے واضح کیا کہ جنوبی ایشیا میں پائیدار امن کے قیام کے لیے مسئلہ کشمیر کا ایک منصفانہ اور پائیدار حل ضروری ہے۔بلاول بھٹو زرداری نے او آئی سی کے رکن ممالک سے کہا کہ وہ کشمیری عوام کے جائز حقوق، خاص طور پر اقوام متحدہ کی قراردادوں کے مطابق حق خود ارادیت کے لیے اپنی اصولی حمایت جاری رکھیں۔او آئی سی کے ممالک نے تمام تنازعات کے پرامن حل کے لئے اقوام متحدہ کی قراردادوں کے مطابق پاکستان کی سفارتی اور مذاکراتی کوششوں کا خیر مقدم کیا، خاص طور پر جموں و کشمیر کے معاملے پر، پاکستان کی بروقت اور شفاف بریفنگ کی تعریف کی اور اظہار یکجہتی کیا۔
