اردوورلڈ کینیڈا( ویب نیوز)گورنر ہاؤس پشاور میں منعقد ہونے والی پُروقار تقریب میں گورنر فیصل کریم کنڈی نے ان سے حلف لیا۔ اس موقع پر صوبائی وزراء، اراکین اسمبلی، اعلیٰ سرکاری افسران اور پارٹی رہنما بھی موجود تھے۔

حلف برداری سے قبل سہیل آفریدی وزیراعلیٰ ہاؤس پہنچے، جہاں انہوں نے اپنے قریبی رفقا کے ہمراہ اجتماعی دعا کی۔ دعا کے بعد وہ گورنر ہاؤس روانہ ہوئے جہاں ان کا پرتپاک استقبال کیا گیا۔

تقریب کے دوران جوش و خروش کا مظاہرہ دیکھنے میں آیا، تاہم بڑی تعداد میں کارکنان کے اسٹیج کے قریب آنے سے کچھ بدنظمی پیدا ہوئی اور نعرے بازی بھی کی گئی۔ اس کے باوجود تقریب مجموعی طور پر خوشگوار ماحول میں مکمل ہوئی۔

سیاسی مبصرین کے مطابق سہیل آفریدی کے وزیراعلیٰ بننے سے صوبے میں نئی سیاسی صورتحال جنم لے سکتی ہے، اور ان کے سامنے سب سے بڑا چیلنج گورننس کے نظام میں بہتری اور امن و امان کی بحالی ہوگا۔