اردوورلڈ کینیڈا ( ویب نیوز )وفاقی تحقیقاتی ادارے نے سائفر کیس میں مزید 5 گواہوں کو پیش کیا۔راولپنڈی کی اڈیالہ جیل میں خصوصی عدالت کے جج ابوالحسنات ذوالقرنین نے سائفر سے متعلق کیس کی سماعت کی، اس دوران پی ٹی آئی چیئرمین عمران خان، شاہ محمود قریشی، حکومتی وکلا عمر اشتیاق، محمد شرجیل، ایف آئی اے، وفاقی حکومت کے اسپیشل پراسیکیوٹر اور بلائے گئے 5 سرکاری گواہ بھی کمرہ عدالت میں موجود تھے۔
ذرائع کے مطابق سماعت کے دوران کمرہ عدالت میں سرکاری گواہوں کے بیانات کی باقاعدہ ریکارڈنگ شروع ہوئی اور اس دوران ایف آئی اے کی ٹیم نے مزید 5 گواہوں کو پیش کیا۔
سائفر کیس میں 10 سرکاری گواہ کمرہ عدالت میں موجود تھے جب کہ پیش کیے جانے والے گواہوں میں عمران سجاد، عقیل حیدر، شمعون قیصر، ایم افضل، نادر خان، اقراء اشرف، فرخ عباس، حسیب بن عزیز، شبیر اور خوشنود شامل ہیں۔
ذرائع کا کہنا ہے کہ سرکاری وکیل رضوان عباسی اور سردار شوکت نے گواہوں کے بیانات قلمبند کیے تاہم کمرہ عدالت میں موجود گواہوں کے مکمل بیانات قلمبند نہیں کیے گئے، آئندہ سماعت پر گواہوں کے تفصیلی بیانات قلمبند کیے جائیں گے۔
بعد ازاں عدالت نے صفائی کے وکلا کی جانب سے کیس کی سماعت 7 نومبر تک ملتوی کردی گئی