اردوورلڈکینیڈا( ویب نیوز)بلوچستان کے ضلع خضدار میں پاک فوج نے 14 اور 15 ستمبر کی درمیانی شب انٹیلیجنس بنیاد پر کامیاب آپریشن کیا جس میں بھارت کے حمایت یافتہ گروہ ’’فتنۃ الہند‘‘ کے پانچ دہشتگرد مارے گئے۔

آئی ایس پی آر کے مطابق اطلاع ملی تھی کہ دہشتگرد خضدار کے علاقے میں موجود ہیں۔ سیکیورٹی فورسز نے فوری کارروائی کرتے ہوئے دہشتگردوں کے ٹھکانے کو مؤثر طریقے سے نشانہ بنایا۔ شدید فائرنگ کے تبادلے میں تمام پانچ دہشتگرد ہلاک ہو گئے۔

ہلاک ہونے والے دہشتگرد علاقے میں متعدد دہشتگردانہ کارروائیوں میں ملوث تھے۔ آپریشن کے دوران ان کے قبضے سے بڑی تعداد میں اسلحہ، گولہ بارود اور دھماکا خیز مواد برآمد کیا گیا۔

آپریشن کے بعد علاقے میں کلیئرنس اور سرچ آپریشن جاری ہے تاکہ کسی بھی چھپے دہشتگرد کو گرفتار یا ہلاک کیا جا سکے۔

پاک فوج اور سیکیورٹی اداروں نے اس عزم کا اعادہ کیا ہے کہ ملک سے بھارتی حمایت یافتہ دہشتگردی کو جڑ سے ختم کیا جائے گا اور تمام دہشتگردوں اور ان کے سہولت کاروں کو انصاف کے کٹہرے میں لایا جائے گا۔