اردو ورلڈ کینیڈا ( ویب نیوز )برازیل میں سابق صدر بولسونارو کے حامیوں نے
دارالحکومت برازیلیا میں کانگریس پر حملہ اور صدر لوئیز اناسیو لولا دا سلوا کے
استعفے کا مطالبہ کردیا۔
غیر ملکی خبر رساں اداروں کے مطابق سابق صدر بولسونارو کے سینکڑوں حامی بھی صدارتی محل اور
سپریم کورٹ کے باہر جمع ہوئے تاہم فوری طور پر یہ واضح نہیں ہوسکا کہ آیا وہ عمارتوں میں داخل ہونے میں
کامیاب ہوئے یا نہیں۔ سوشل میڈیا پر وائرل ہونے والی ویڈیوز میں بولسونارو کے حامیوں کو کھڑکیوں کے شیشے
توڑتے اور نیشنل کانگریس کی عمارت کی چھت پر چڑھتے ہوئے دیکھا جا سکتا ہے۔
سیکورٹی فورسز نے مظاہرین کو منتشر کرنے کے لیے آنسو گیس کا استعمال کیا جب کہ کانگریس پر
حملے کے بعد کانگریس کی عمارت اور آس پاس کے علاقے کو سیل کردیا گیا ہے۔
واضح رہے کہ یہ حملہ برازیل کے صدر لوئیز اناسیو لولا کے یکم جنوری کو حلف اٹھانے کے ایک ہفتے
بعد کیا گیا ہے۔دوسری جانب برازیل کے صدر لوئیز اناسیو لولا کا کہنا ہے کہ برازیلیا فسادات میں ملوث
ہر فرد کو ڈھونڈ کر سزا دی جائے گی۔
علاوہ ازیں امریکی وزیر خارجہ انتھونی بلینکن نے برازیلین کانگریس پر حملے کی مذمت کرتے ہوئے
کہا ہے کہ جمہوری اداروں پر حملے ناقابل قبول ہیں۔
