اردو ورلڈ کینیڈا ( ویب نیوز ) انگلینڈ کے خلاف ٹی ٹوئنٹی میچ میں بھارتی کرکٹ ٹیم کے نوجوان بلے باز ابھیشیک شرما نے دھواں دھار اننگز کھیل کر کئی ریکارڈ توڑ ڈالے۔

انگلینڈ اور بھارت کے درمیان سیریز کا پانچواں اور آخری ٹی ٹوئنٹی میچ اتوار کو ممبئی میں کھیلا گیا۔ہندوستان نے انگلینڈ کی دعوت پر بیٹنگ کرتے ہوئے مقررہ 20 اوورز میں 9 وکٹوں کے نقصان پر 247 رنز کا بڑا اسکور بنایا۔نوجوان اوپنر ابھیشیک شرما نے ہندوستانی ٹیم کی جانب سے ریکارڈ ساز اننگز کھیلی۔ ابھیشیک شرما نے 37 گیندوں پر سنچری اسکور کی اور 54 گیندوں پر 13 چھکوں اور 7 چوکوں کی مدد سے مجموعی طور پر 135 رنز بنائے۔ابھیشیک نے T20 انٹرنیشنل میں ہندوستان کے لیے دوسری تیز ترین سنچری بنائی۔

اس سے قبل روہت شرما نے 35 گیندوں میں سنچری بنائی تھی۔ ابھیشیک شرما انگلینڈ کے خلاف 135 رنز کی اننگز کے ساتھ T20 انٹرنیشنل میں ہندوستان کے لیے سب سے زیادہ انفرادی اسکورر بن گئے۔اس سے قبل یہ ریکارڈ شبمن گل کے پاس تھا جنہوں نے 126 رنز کی اننگز کھیلی تھی۔انگلینڈ کے خلاف 13 چھکے لگانے والے ابھیشیک شرما نے ٹی 20 انٹرنیشنل میچ میں ہندوستانی اننگز میں سب سے زیادہ چھکے لگانے کا ریکارڈ بھی اپنے نام کیا۔بھارتی ٹیم کے 247 رنز کے جواب میں انگلش ٹیم 11ویں اوور میں صرف 97 رنز پر ڈھیر ہو گئی اور اس طرح بھارت نے انگلینڈ کے خلاف 5 میچوں کی سیریز 1-4 سے جیت لی۔