اردو ورلڈ کینیڈا ( ویب نیوز ) آئی سی سی ٹی ٹوئنٹی ورلڈ کپ کے اہم مرحلے میں پاکستان اور بھارت کے ہائی وولٹیج مقابلے
سے قبل اہم سفارتی و انتظامی سرگرمیاں تیز ہو گئی ہیں۔ ذرائع کے مطابق چیئرمین پاکستان کرکٹ بورڈ Mohsin Naqvi کے سری لنکا کے دارالحکومت کولمبو جانے کا امکان ہے جہاں وہ قومی ٹیم سے ملاقات کریں گے اور میچ انتظامات کا جائزہ لیں گے۔ذرائع کا کہنا ہے کہ چیئرمین پی سی بی ممکنہ طور پر ٹیم کی حوصلہ افزائی کے ساتھ ساتھ آئی سی سی حکام سے بھی ملاقات کریں گے۔ کولمبو میں ہونے والے اس بڑے مقابلے کے موقع پر سیکیورٹی، انتظامی امور اور وینیو کی تیاریوں پر خصوصی توجہ دی جا رہی ہے۔
دوسری جانب امین الاسلام صدر بنگلہ دیش کرکٹ بورڈ کی بھی کولمبو آمد متوقع ہے، جبکہ ایشیئن کرکٹ کونسل کے دیگر اراکین کی شرکت کا امکان ظاہر کیا جا رہا ہے۔ پاکستان اور بھارت کے میچ کی اہمیت کے پیش نظر آئی سی سی کے اعلیٰ عہدیداران بھی اس موقع پر کولمبو میں موجود ہوں گے۔
یاد رہے کہ ٹی ٹوئنٹی ورلڈ کپ میں پاکستان اور بھارت کا بڑا مقابلہ اتوار کو کولمبو میں کھیلا جائے گا۔ موسمیاتی پیشگوئی کے مطابق آئندہ دو سے تین روز کے دوران وقفے وقفے سے ہلکی اور تیز بارش کا امکان ہے، جس کے باعث میچ متاثر ہونے کے خدشات بھی موجود ہیں۔ منتظمین متبادل انتظامات اور ڈک ورتھ لوئس میتھڈ کے اطلاق سمیت تمام امکانات کا جائزہ لے رہے ہیں۔
پاکستان ٹیم نے بھارت کے خلاف میچ کی تیاریوں کے لیے دو روزہ وقفے کے بعد جمعے کو بھرپور ٹریننگ سیشن کیا۔ کھلاڑیوں نے نیٹ پر بیٹنگ، بولنگ اور فیلڈنگ کی مشقیں کیں جبکہ کوچنگ اسٹاف نے حکمت عملی پر خصوصی سیشن بھی منعقد کیا۔ادھر بھارتی کرکٹ ٹیم دہلی سے کولمبو پہنچ چکی ہے تاہم بھارتی اوپنر ابیشک شرما کی پاکستان کے خلاف میچ میں شرکت غیر یقینی بتائی جا رہی ہے، جس سے بھارتی ٹیم کے کمبی نیشن پر اثر پڑ سکتا ہے۔کرکٹ شائقین کی نظریں اس سنسنی خیز مقابلے پر جمی ہوئی ہیں، جہاں روایتی حریف ایک بار پھر عالمی ایونٹ میں آمنے سامنے ہوں گے۔ ماہرین کے مطابق یہ میچ نہ صرف گروپ اسٹیج بلکہ ٹورنامنٹ کی مجموعی صورتحال پر بھی گہرے اثرات مرتب کر سکتا ہے۔
