اردو ورلڈ کینیڈا ( ویب نیوز ) قطر میں اسرائیل اورحماس کے درمیان جنگ بندی کیلئے مذاکرات قطر میں دوبارہ شروع ہو گئے ۔حماس نےتصدیق کر دی

حماس کے اہلکار طاہر النونو نے رائٹرز کو انٹرویو دیتے ہوئے اس کی تصدیق کی ہے۔حماس کے رہنما نے کہا کہ فریقین کے درمیان مذاکرات بغیر کسی پیشگی شرط کے ہو رہے ہیں جس میں اب تک کے تمام امور پر تبادلہ خیال کیا جائے گا۔ان مذاکرات کا مقصد غزہ میں اکتوبر 2023 سے جاری خونریز جنگ کو ختم کرنا اور متاثرہ افراد کو فوری امداد فراہم کرنا ہے۔واضح رہے کہ قطر، مصر اور امریکہ کی مشترکہ کوششوں سے ان مذاکرات کا دوبارہ آغاز ممکن ہوا ہے۔اسرائیلی وفد اور حماس کے نمائندے بالواسطہ طور پر ان مذاکرات میں شامل ہیں جبکہ قطر اور مصر ثالث کا کردار ادا کر رہے ہیں۔ذرائع کے مطابق مذاکرات میں فوری جنگ بندی، انسانی ہمدردی کی بنیاد پر رسائی، قیدیوں کے تبادلے اور مستقبل کے سیاسی حل پر بات چیت کی جائے گی۔اس سلسلے میں، قطری وزارت خارجہ کے ترجمان نے امید ظاہر کی کہ فریقین تعمیری بات چیت کے بعد دیرپا اور منصفانہ جنگ بندی کے معاہدے پر متفق ہوں گے۔دوسری جانب مبصرین کا کہنا ہے کہ مذاکرات فریقین کو عارضی جنگ بندی پر راضی کرنے پر آمادہ کر سکتے ہیں جو بعد میں مستقل سیاسی حل کی بنیاد بن سکتی ہے۔دوحہ میں یہ مذاکرات ایسے وقت میں ہو رہے ہیں جب خطے میں کشیدگی ایک بار پھر بڑھ رہی ہے اور عالمی برادری فوری اور دیرپا حل تلاش کر رہی ہے۔صدر ڈونلڈ ٹرمپ نے بھی غزہ میں بے گناہ شہریوں کی بھوک سے ہلاکتوں پر تشویش کا اظہار کیا اور عندیہ دیا کہ یہ مسئلہ جلد حل ہو جائے گا۔