اردوورلڈکینیڈا( ویب نیوز)امریکی گلوکارہ ٹیلر سوئفٹ کے نئے البم “دی لائف آف اے شو گرل” کی تشہیری مہم ایک غیر متوقع تنازع میں گھر گئی ہے، جہاں مداحوں نے الزام عائد کیا ہے کہ مہم میں مصنوعی ذہانت (AI) سے تیار کردہ ویڈیوز استعمال کی گئی ہیں۔
یہ مہم گوگل کے اشتراک سے شروع کی گئی تھی، جس کا مقصد دنیا بھر کے شائقین کو ایک انٹرایکٹو ڈیجیٹل سرگرمی میں شامل کرنا تھا۔ صارفین جب گوگل پر "Taylor Swift” سرچ کرتے تو ایک پیغام ظاہر ہوتا، جو انہیں بارہ شہروں کے بارہ دروازوں کے ذریعے ایک ویڈیو انلاک کرنے کی ترغیب دیتا۔
مداحوں کو دنیا کے مختلف مقامات پر موجود QR کوڈز کے ذریعے 12 خفیہ ویڈیوز تک رسائی حاصل کرنا تھی، جن میں نئے البم سے متعلق اشارے موجود تھے۔ جیسے ہی مجموعی طور پر ایک کروڑ بیس لاکھ کلکس مکمل ہوئے، یوٹیوب پر البم کا ایک لیریک ویڈیو “The Fate of Ophelia” کے نام سے جاری کیا گیا۔
تاہم، اسی مرحلے پر مداحوں نے شکوک و شبہات کا اظہار کیا کہ مہم میں پیش کی گئی ویڈیوز جنریٹو اے آئی سے بنائی گئی ہیں۔ کئی مداحوں نے دعویٰ کیا کہ مناظر کی روشنی، پس منظر، اور حرکات غیر قدرتی محسوس ہو رہی ہیں، جن سے یہ گمان ہوتا ہے کہ یہ ویڈیوز کمپیوٹر سے تخلیق شدہ ہیں۔
چاہنے والوں نے پہیلیاں حل کرنے کے بجائے ویڈیوز کا فریم بائی فریم تجزیہ شروع کر دیا تاکہ مصنوعی ذہانت کے استعمال کے شواہد ڈھونڈے جا سکیں۔ خاص طور پر وہ ویڈیو جسے گوگل کے انسٹاگرام اکاؤنٹ پر شیئر کیا گیا — جس میں زمین کے ایریل شاٹ سے ایک چمکدار، جواہراتی منظر اور پھر ایک نارنجی دروازہ ظاہر ہوتا ہے — مداحوں کی توجہ کا مرکز بن گئی۔
اب تک ٹیلر سوئفٹ یا گوگل کی جانب سے اس بارے میں کوئی وضاحتی بیان سامنے نہیں آیا کہ آیا مہم میں واقعی اے آئی ٹیکنالوجی کا استعمال ہوا تھا یا نہیں۔ تاہم، ویڈیوز کا سنیماٹک انداز اور غیر معمولی بصری اثرات اس قیاس آرائی کو مزید تقویت دے رہے ہیں۔
