اردو ورلڈ کینیڈا (ویب نیوز)آزاد کشمیر بلدیاتی الیکشن کا دوسرا مرحلہ، تحریک انصاف کو شکست ، آزاد کشمیر کے وزیراعظم سردار تنویر الیاس اپنی آبائی یونین کونسل بھی ہار گئے۔ ان کی یوسی میں پیپلز پارٹی کے امیدوار اویس لیاقت 134 ووٹ لے کر کامیاب ہوئے، پی ٹی آئی کے امیدوار نے 111 ووٹ حاصل کیے۔
راولاکوٹ میں بھی پی ٹی آئی کو بدترین شکست کا سامنا کرنا پڑا ہے۔ راولاکوٹ میونسپل کارپوریشن کی 22 نشستوں میں سے پی ٹی آئی صرف 3 نشستیں جیت سکی ہے۔

اسی طرح مظفرآباد کے بعد آزاد کشمیر کے ایک اور بڑے شہر راولاکوٹ میں بھی اپوزیشن کا میئر ہوگا۔ پونچھ ڈویژن میں 12 امیدوار پہلے ہی بلا مقابلہ منتخب ہو چکے ہیں۔

اس سے قبل آزاد کشمیر میں بلدیاتی انتخابات کے پہلے مرحلے میں حکمران تحریک انصاف کو شکست کا سامنا کرنا پڑا تھا۔

آزاد کشمیر کے بلدیاتی الیکشن کے پہلے مرحلے میں دارالحکومت مظفرآباد میں پی ٹی آئی کو شکست ہوئی، مظفرآباد میونسپل کارپوریشن کی 36 میں سے 8 نشستوں پر پی ٹی آئی نے کامیابی حاصل کی، جب کہ مسلم لیگ ن 12 وارڈز کے ساتھ پہلے نمبر پر رہی۔

مظفرآباد بلدیاتی انتخابات کے پہلے مرحلے میں پیپلز پارٹی نے بھی 7 نشستیں حاصل کیں، 7 آزاد امیدوار بھی کامیاب ہوئے جب کہ مسلم کانفرنس نے 2 نشستیں حاصل کیں

3 اضلاع نیلم، وادی جہلم اور مظفرآباد کی یونین کونسلوں کی 74 میں سے 33 نشستوں پر تحریک انصاف کامیاب ہوئی۔

غیر حتمی غیر سرکاری نتائج کے مطابق پہلے مرحلے میں پیپلز پارٹی نے 23، مسلم لیگ ن نے 10، آزاد امیدواروں نے 5، جب کہ مسلم کانفرنس نے 2 نشستوں پر کامیابی حاصل کی۔

دوسری جانب میونسپل کارپوریشن باغ کے 15 میں سے 14 وارڈز کا غیر سرکاری غیر حتمی نتیجہ آ گیا ہے جس میں تحریک انصاف 9، پیپلز پارٹی 2 جب کہ 3 نشستوں پر آزاد امیدوار کامیاب ہوئے ہیں۔

پلندری میونسپل کمیٹی کی 8 میں سے 4 نشستوں پر تحریک انصاف کامیاب ہے جب کہ 2 پر مسلم لیگ ن اور 2 پر آزاد امیدوار کامیاب ہیں۔