اردوورلڈ کینیڈا( ویب نیوز)پاکستان تحریک انصاف (پی ٹی آئی) نے نومنتخب امریکی صدر ڈونلڈ ٹرمپ کے خصوصی ایلچی رچرڈ گرینل کے عمران خان سے متعلق بیان کا خیرمقدم کیا ہے۔

پی ٹی آئی کے سیکرٹری اطلاعات شیخ وقاص اکرم نے رچرڈ گرینل کے بیان پر ردعمل دیتے ہوئے کہا کہ امریکہ اور یورپی یونین سمیت پوری دنیا اس وقت پاکستان میں انسانی حقوق کی خلاف ورزیوں کے خلاف آواز اٹھا رہی ہے۔
انہوں نے کہا کہ یہ کوئی نئی بات نہیں ہے۔ جب بھی کوئی ملک انسانی حقوق کی خلاف ورزی کرے گا اور شہریوں کے فوجی ٹرائل جیسے غیر قانونی اقدامات کرے گا تو دنیا اس کے خلاف آواز اٹھائے گی۔
انہوں نے کہا کہ رچرڈ گرینل کے حوالے سے جب بھی کوئی پاکستان میں 9 مئی، 26 نومبر کے قتل عام، عام شہریوں کے فوجی ٹرائل اور خاص طور پر عمران خان کی رہائی کے حوالے سے آواز اٹھائے گا ہم ان کا شکریہ ادا کریں گے۔
شیخ وقاص اکرم نے اپنے بیان میں کہا کہ یہ اس بات کا ثبوت ہے کہ ہم جو کہہ رہے ہیں دنیا اس کی تائید کرتی ہے۔