اردو ورلڈ کینیڈا ( ویب نیوز)پاکستان تحریک انصاف کے چیئرمین اور سابق وزیراعظم عمران خان نے کہا ہے کہ تحریک انصاف اور اس کے کارکنان عدلیہ کے تقدس کا ہر قیمت پر تحفظ کریں گے۔
چیئرمین تحریک انصاف عمران خان سے پی ٹی آئی رہنما شہباز گل نے زمان پارک میں ملاقات کی جس میں موجودہ سیاسی صورتحال اور لائحہ عمل پر تبادلہ خیال کیا گیا۔
اس موقع پر سابق وزیراعظم عمران خان نے کہا کہ ملکی معیشت پہلے ہی تباہ ہو چکی ہے، اب الیکشن نہ کروا کر آئین شکنی کے مرتکب ہو رہے ہیں۔ اپنی آئین شکنی کو بچانے کے لیے امپورٹڈ حکومت عدلیہ پر حملہ آور ہے۔
چیئرمین پی ٹی آئی نے کہا کہ ہیلتھ کارڈز سمیت کئی عوام دوست منصوبے روک کر غریبوں پر بوجھ بڑھ رہا ہے، ان میں عام آدمی کا سامنا کرنے کی ہمت نہیں، مہنگائی بے قابو ہو چکی ہے، یہ خود ذمہ دار ہیں۔
معیشت کے چیمپئنز آج کل منہ چھپا رہے ہیں، ہر پاکستانی جان چکا ہے کہ وہ الیکشن سے کیوں بھاگ رہے ہیں۔
شہباز گل نے کہا کہ پارٹی ورکر پارٹی کے نظریے کے ساتھ کھڑا ہے، میری درخواست ہے کہ آئندہ الیکشن میں یوتھ ونگ، آئی ایس ایف اور سوشل میڈیا ونگ سے پارٹی کے نظریاتی نوجوانوں کو کم از کم دس فیصد ٹکٹ دئیے جائیں۔
ڈاکٹر شہباز گل نے چیئرمین پی ٹی آئی سے مزید کہا کہ مشکل حالات میں پارٹی کے ساتھ کھڑے ہونے والے کارکن کو الیکٹ ایبل پر ترجیح دی جائے۔
