اردو ورلڈ کینیڈا ( ویب نیوز )پاکستان تحریک انصاف (پی ٹی آئی) نے لاہور میں آرٹیکل 144 کے نفاذ کو الیکشن کمیشن میں چیلنج کر دیا۔
چیئرمین پی ٹی آئی عمران خان کی ہدایت پر بابر اعوان نے الیکشن کمیشن میں درخواست دائر کی، جس میں کہا گیا کہ تحریک انصاف کے جلسے پر دفعہ 144 کا نفاذ غیر قانونی ہے، انتخابی مہم تحریک انصاف کا آئینی حق ہے۔ درخواست میں استدعا کی گئی کہ الیکشن کمیشن دفعہ 144 کا نفاذ واپس لے۔
درخواست میں کہا گیا ہے کہ پنجاب حکومت دفعہ 144 کا نفاذ کرکے سپریم کورٹ کے فیصلے کے پیرا 15 کی خلاف ورزی کر رہی ہے، پنجاب حکومت پی ایس ایل میچ کو جواز بنا کر ریلی کو روکنے کی کوشش کر رہی ہے۔
متن کے مطابق تحریک انصاف کی ریلی اور پی ایس ایل میچ کا روٹ مختلف ہے۔ تحریک انصاف کی ریلی شام ساڑھے 5 بجے ختم ہوگی جبکہ پی ایس ایل کا میچ شام 7 بجے شروع ہوگا۔ اس سے قبل پی ایس ایل کے دوران کسی بھی شہر نے دفعہ 144 نافذ نہیں کی تھی۔
درخواست گزار کے مطابق پنجاب حکومت غیر قانونی طور پر تحریک انصاف کی انتخابی مہم روک رہی ہے۔
