اردو ورلڈ کینیڈا ( ویب نیوز )عمران خان پر ٹکٹ بیچنے کا الزام لگانے پر تحریک انصاف نے خواجہ آصف کو ہرجانے کا نوٹس بھجوا دیا۔پی ٹی آئی نے وزیر دفاع خواجہ آصف کو 10 ارب روپے ہرجانے کا نوٹس بھجوایا ہے جسے عثمان ڈار نے بھیجا ہے۔

نوٹس میں کہا گیا کہ خواجہ آصف نے عمران خان پر سیالکوٹ میں ٹکٹ بیچنے کا الزام لگایا اور ٹکٹوں کے عوض سیالکوٹ سے 30 کروڑ روپے وصول کرنے کا جھوٹا الزام لگایا۔

نوٹس کے مطابق خواجہ آصف نے سیالکوٹ کے ٹکٹ ہولڈرز پر بے بنیاد اور سنگین الزامات لگائے اور پریس کانفرنس میں عمران خان اور پارٹی رہنماں پر براہ راست بدزبانی کی۔

نوٹس میں خواجہ آصف سے یہ بھی مطالبہ کیا گیا ہے کہ وہ اپنے بے بنیاد الزام پر چیئرمین تحریک انصاف سے تحریری معافی مانگیں اور اس معافی نامہ کو ملک کے معروف اخبارات میں شائع کرائیں۔

نوٹس کے مطابق معافی نہ مانگنے کی صورت میں خواجہ آصف 10 ارب روپے ہرجانہ ادا کریں، معافی نہ مانگنے یا ہرجانہ ادا نہ کرنے کی صورت میں خواجہ آصف کے خلاف قانونی کارروائی کی جائے گی۔