اردو ورلڈ کینیڈا ( ویب نیوز)پاکستان تحریک انصاف (پی ٹی آئی) کی جانب سے چیف جسٹس آف پاکستان (سی جے پی) جسٹس عمر عطا بندیال سے اظہار یکجہتی کے لیے آج صوبائی دارالحکومت سمیت ملک کے مختلف شہروں میں ریلیاں نکالی جائیں گی۔
چیئرمین تحریک انصاف اور سابق وزیراعظم عمران خان نے گزشتہ روز چیف جسٹس سے اظہار یکجہتی کے لیے ریلیاں نکالنے کا اعلان کیا تھا جس کے مطابق آج شام ساڑھے 5 بجے ملک بھر میں ایک گھنٹہ ریلیاں نکالی جائیں گی جب کہ عمران خان خود لاہور میں جلسہ کریں گے۔
آئین، جمہوریت اور انسانی حقوق کے تحفظ کے حق میں تحریک انصاف کل یعنی ہفتے کو 4 شہروں (لاہور، راولپنڈی، اسلام آباد اور پشاور) میں ریلیوں کا انعقاد کر رہی ہے۔ لاہور ریلی زمان پارک سے شروع ہو کر لکشمی چوک پر اختتام پذیر ہو گی۔ عوام ریلی میں بھرپور شرکت کر کے مسلط کردہ گروہ کو بتائے… pic.twitter.com/NkILtwjxlu
— PTI (@PTIofficial) May 5, 2023
واضح رہے کہ لاہور میں ریلی عمران خان کی رہائش گاہ زمان پارک سے شروع ہو کر لکشمی چوک پر اختتام پذیر ہوگی۔
گزشتہ روز ویڈیو لنک کے ذریعے اپنے خطاب میں پی ٹی آئی چیئرمین کا کہنا تھا کہ لاہور، اسلام آباد، راولپنڈی اور پشاور میں ریلیاں نکالوں گا، لاہور میں جلسے کی قیادت میں خود کروں گا۔ عوام باہر آئیں اور اپنے چیف جسٹس کے ساتھ یکجہتی کے لیے کھڑے ہوں۔
سابق وزیراعظم نے قوم سے اپیل کی کہ یہ فیصلہ کن وقت ہے، آپ کو نکلنا ہوگا۔ سپریم کورٹ کے مطابق الیکشن 14 مئی کو ہونا ہے، حکومت عدالت کا فیصلہ نہیں مان رہی۔ فیصلہ نہ ماننا، جس ملک میں حکومت عدالت کے فیصلے پر عمل نہیں کرتی وہاں بنیادی حقوق سلب ہوتے ہیں۔
عمران خان نے کہا کہ یہی وقت ہے، سب کو سپریم کورٹ کے ساتھ کھڑا ہونا ہے، آئین کو بچانے کے لیے عوام باہر نکلیں اور پیغام دیں کہ قوم چیف جسٹس کے ساتھ کھڑی ہے، ہمیں ان کو پیغام دینا ہے کہ قوم کہاں کھڑی ہے۔
اسلام آباد میں دفعہ 144 نافذ العمل ہے۔ جلسے، جلوسوں اور ریلیاں نکالنے پر پابندی ہے۔ اسلام آباد پولیس سے کسی ریلی کی اجازت نہیں لی گئی۔
بغیر اجازت ریلیوں کے خلاف قانونی کارروائی کی جائے گی۔ کل شہریوں کو رستوں کی بندش کے باعث مشکلات کا سامنا کرنا پڑسکتا ہے۔
شہری سفر کرنے سے پہلے…
— Islamabad Police (@ICT_Police) May 5, 2023
ان کا کہنا تھا کہ بار بار میرا مذاق اڑاتے تھے کہ الیکشن چاہتے ہیں تو اسمبلیاں تحلیل کر دیں، اب آئین کی دھجیاں اڑانے کی تیاریاں کی جا رہی ہیں، ہم صرف عدلیہ کی طرف دیکھ رہے ہیں، آئے روز ہمارے بنیادی حقوق پامال ہو رہے ہیں۔
ان کا مزید کہنا تھا کہ ہماری لڑائی مافیاز سے ہے، ہمیں آخری گیند تک لڑنا ہے، کبھی پیسے کا، کبھی بجٹ کا، کبھی انٹرنیشنل مانیٹری فنڈ (آئی ایم ایف) کا بہانہ بنا رہے ہیں، آئین میں واضح نگران حکومتوں کی مدت ختم ہو چکی ہے۔
دوسری جانب پاکستان تحریک انصاف کی جانب سے جلسے کے اعلان پر اسلام آباد پولیس نے اجازت نہ لینے پر کارروائی کا فیصلہ کیا ہے۔
اسلام آباد پولیس کے مطابق دفعہ 144 کے نفاذ کے باعث کسی بھی قسم کے جلسے، جلوس اور ریلیاں نکالنے پر پابندی ہے۔
