اردو ورلڈ کینیڈا ( ویب نیوز)پاکستان تحریک انصاف نے پرویز الٰہی کے گھر پر چھاپے کے باوجود حکومت سے مذاکرات جاری رکھنے کا اعلان کیا ہے۔
پاکستان تحریک انصاف کے سینئر نائب صدر فواد چوہدری نے کہا کہ مذاکرات کو سبوتاژ کرنے کی کوششوں کو مسترد کرتے ہوئے تحریک انصاف نے سپریم کورٹ کے احکامات کو مدنظر رکھتے ہوئے مذاکرات جاری رکھنے کا فیصلہ کیا ہے۔
انہوں نے کہا کہ پی ٹی آئی نے آئین کے دائرے میں رہتے ہوئے انتخابات کے فریم ورک پر حکومت کے ساتھ مذاکرات جاری رکھنے کا فیصلہ کیا ہے اور حتمی ایجنڈے پر منگل کو بات کی جائے گی۔
اس سے قبل وفاقی وزراء نے پی ٹی آئی کے صدر پرویز الٰہی کے گھر پر چھاپے سے لاتعلقی کا اظہار کرتے ہوئے پنجاب کی نگران حکومت کو ذمہ دار ٹھہرایا جب کہ اینٹی کرپشن پنجاب نے عدالتی دستاویزات ملنے کے بعد پرویز الٰہی کی گرفتاری 6 مئی تک ملتوی کردی۔
مذاکرات کو سبوتاژ کرنے کی کوششوں کو مسترد کرتے ہوئے تحریک انصاف نے فیصلہ کیا ہے کہ آئین کے دائرے میں رہتے ہوئے انتخابات کے فریم ورک پر حکومت سے مذاکرات جاری رہیں گے اورعدالتی احکامات کو مدنظر رکھتے ہوئے منگل کو حتمی ایجنڈے پر بات کی جائے گی۔
اس سے قبل عمران خان کی زیر صدارت زمان پارک میں پاکستان تحریک انصاف کے مرکزی رہنماؤں کا اجلاس ہوا جس میں ارکان نے حکومت سے مذاکرات جاری رکھنے کی تجویز دیتے ہوئے کہا کہ اگر ہم پیچھے ہٹے تو حکومت کو سپریم کورٹ میں موقع مل جائے گا۔
