اردو ورلڈ کینیڈا ( ویب نیوز ) کینیڈا کے شہر وینکوور میں واقع ایک رہائشی عمارت “دی یارو” (The Yarrow) کے کرایہ داروں کو اس وقت شدید تشویش کا سامنا کرنا پڑا

جب عمارت کی مالک کمپنی “ریل اسٹار گروپ” (Realstar Group) نے انہیں ایک نجی فیس بک گروپ میں گفتگو کرنے پر بے دخلی کی دھمکی دے دی۔ بعدازاں کمپنی نے اس دھمکی آمیز خط پر معافی مانگ لی اور کہا کہ کرایہ داروں نے کسی قسم کی قانونی خلاف ورزی نہیں کی۔
گزشتہ ماہ عمارت کے کرایہ داروں کے دروازوں پر ایک خط چسپاں کیا گیا جس کی پہلی سطر موٹے حروف میں لکھی تھی: “WARNING: BREACH OF TENANCY AGREEMENT” (انتباہ: کرایہ داری معاہدے کی خلاف ورزی)۔ اس خط میں کہا گیا تھا کہ کرایہ دار “Yarrow Residential Hub” نامی نجی فیس بک گروپ کے رکن ہیں، جہاں وہ عمارت سے متعلق مسائل پر گفتگو کرتے ہیں اور دیگر کرایہ داروں کو شکایات درج کرانے کی ترغیب دیتے ہیں۔ کمپنی کے مطابق یہ طرزِ عمل مینجمنٹ میں مداخلت اور کرایہ داری معاہدے و رہائشی قانون (Residential Tenancy Act) کی خلاف ورزی کے مترادف ہے۔ خط کے آخر میں واضح طور پر دھمکی دی گئی تھی کہ “اگر آپ نے دوبارہ ایسے اقدامات کیے تو آپ کی کرایہ داری ختم کر دی جائے گی۔”
کئی کرایہ داروں نے سی بی سی نیوز کو بتایا کہ وہ اس خط سے شدید خوفزدہ اور حیران ہوئے، خاص طور پر اس بات پر کہ کمپنی نے نجی فیس بک گروپ میں شامل افراد کی شناخت کیسے حاصل کی، کیونکہ کچھ اراکین فرضی ناموں یا گمنام اکاؤنٹس سے پوسٹ کرتے تھے۔ ایک رہائشی نے کہا کہ “یہ خط دیکھ کر ایسا لگا جیسے ہماری نجی زندگی پر حملہ کیا گیا ہو۔ ہم صرف اپنے ہمسایوں سے بات کر رہے تھے۔”
ریل اسٹار گروپ نے ابتدا میں کہا کہ وہ معاملے کی تحقیقات کر رہی ہے اور اپنے ملازمین کے محفوظ ماحول کو یقینی بنانے کے لیے اقدامات کر رہی ہے۔ تاہم چند دن بعد کمپنی نے ایک باضابطہ معافی نامہ جاری کرتے ہوئے کہا کہ “ہم یہ واضح کرنا چاہتے ہیں کہ کرایہ داروں نے Residential Tenancy Act کی کوئی خلاف ورزی نہیں کی۔ انہیں اپنے گھروں سے متعلق معاملات پر بات کرنے، تجربات شیئر کرنے اور ایک دوسرے سے رابطے کا مکمل حق حاصل ہے۔”
معافی سے قبل عمارت کے دس کرایہ داروں نے خود کو “Concerned Tenants of The Yarrow” کے نام سے منظم کیا اور کمپنی کو ایک تحریری جواب دیا، جس میں خط کے الزامات کو بے بنیاد اور ہراساں کرنے والا قرار دیا گیا۔ انہوں نے ریل اسٹار سے مطالبہ کیا کہ ایسے ای میلز اور خطوط بھیجنا بند کیے جائیں جو کرایہ داروں کے لیے دھمکی آمیز یا خوف پیدا کرنے والے ہوں، اور کمپنی کرایہ داروں کی آن لائن یا ذاتی گفتگو کی نگرانی سے گریز کرے۔
وینکوور ٹیننٹس یونین کی نمائندہ ماریاہ جاوادی نے اس اقدام کو انتہائی واضح دھمکی اور خوف پھیلانے کی کوشش قرار دیا۔ ان کا کہنا تھا کہ “یہ پہلا موقع ہے کہ کسی مالک مکان نے براہِ راست کہا ہو کہ ہم کرایہ داروں کو صرف ایک دوسرے سے بات کرنے پر سزا دیں گے۔ یہ قابلِ تشویش رجحان ہے۔”
Tenant Resource and Advisory Centre (TRAC) کے وکیل رابرٹ پیٹرسن نے کہا کہ کمپنی کی جانب سے دیا گیا جواز قانونی بنیاد سے محروم ہے۔ ان کے مطابق Residential Tenancy Act کرایہ داری معاہدوں کو نجی یا خفیہ نہیں مانتا اور کرایہ داروں کے لیے ایک دوسرے کو شکایت درج کرانے یا مسائل پر گفتگو کی ترغیب دینا کسی جرم کے زمرے میں نہیں آتا۔ پیٹرسن کے مطابق یہ واقعہ دراصل ایک ایسی کوشش لگتی ہے جس میں مالک مکان کرایہ داروں کے باہمی تعاون کو روکنے کی کوشش کر رہا ہو۔
“Yarrow Residential Hub” نامی نجی فیس بک گروپ میں تقریباً 100 ارکان ہیں جو ایک دوسرے سے عمارت کے مسائل، مقامی معلومات اور اشیاء کی خرید و فروخت سے متعلق بات کرتے ہیں۔ یہ گروپ ریل اسٹار کے عمارت خریدنے سے پہلے قائم ہوا تھا۔
ذرائع کے مطابق وینکوور میں ماضی میں بھی ایک مالک مکان نے کرایہ داروں کے خلاف توہینِ عدالت (libel) کا مقدمہ دائر کیا تھا جب انہوں نے واٹس ایپ گروپ بنا کر کرایہ بڑھانے کے خلاف مہم چلائی، تاہم عدالت میں کیس مسترد کر دیا گیا۔ماریاہ جاوادی کے مطابق جب کرایہ دار ایک دوسرے کے ساتھ کھڑے ہوتے ہیں تو وہ زیادہ مضبوط ہوتے ہیں۔ ان کا کہنا تھا کہ “کسی مالک مکان کو یہ حق حاصل نہیں کہ وہ صرف بات چیت یا معلومات کے تبادلے پر کسی کو بے دخل کرے۔”
یہ واقعہ اس امر کی نشاندہی کرتا ہے کہ کینیڈا میں بڑھتے ہوئے کرایہ کے بحران کے دوران کرایہ داروں کے حقوق اور نجی آزادیوں کا تحفظ ایک نیا محاذ بن چکا ہے۔ ریل اسٹار کی معافی اگرچہ کشیدگی کم کرنے کی کوشش ہے، مگر اس واقعے نے ملک بھر میں مالک مکان اور کرایہ داروں کے تعلقات پر ایک نئی بحث چھیڑ دی ہے۔