اردو ورلڈ کینیڈا ( ویب نیوز )بلوچستان میں سکیورٹی فورسز کی چیک پوسٹ پر دہشت گردوں کا حملہ، فائرنگ کے تبادلے میں 2 اہلکار شہید ہوگئے۔

بلوچستان کے ضلع کیچ کے علاقے سنگوان میں پاک ایران سرحد پر سیکیورٹی چیک پوسٹ پر دہشت گردوں نے حملہ کیا۔

آئی ایس پی آر کے مطابق دہشت گردوں سے شدید فائرنگ کے تبادلے میں 2  سکیورٹی اہلکار شہید ہوگئے، فورسز نے کامیابی سے دہشت گردوں کو پیچھے دھکیل دیا۔

ترجمان پاک فوج کے مطابق شہید اہلکاروں میں 34 سالہ سپاہی حسنین اشتیاق کا تعلق ڈی جی خان جبکہ 27 سالہ سپاہی عنایت اللہ جھل مگسی کا رہائشی تھا۔

آئی ایس پی آر کا کہنا تھا کہ سکیورٹی فورسز نے فرار ہونے والے دہشت گردوں کی گرفتاری کے لیے فوری طور پر علاقے میں کلیئرنس آپریشن شروع کردیا، دہشت گردوں کو سرحد پار سے فرار ہونے سے روکنے کے لیے ایرانی حکام سے بھی رابطہ کیا جا رہا ہے۔

ترجمان پاک فوج کا کہنا ہے کہ کسی کو بلوچستان میں امن و استحکام کی کوششوں کو سبوتاژ کرنے کی اجازت نہیں دی جا سکتی۔